Танымал әнші Жазира Байырбекова алғаш рет келін болып түскенде қандай қиындықтарға тап болғанын ашық айтып берді, деп хабарлайды ozgeris.info.
Өнер иесі «Мамский әңгіме» подкастында отбасының алғашқы жылдары үлкен сынақтармен өткенін еске алды. Жазираның айтуынша, күйеуі Жанболатпен жаңа өмір бастаған алғашқы жылдары өзін соғыста жүргендей сезінген.
«Қиын болды. Төркініме қыдырып барып, қайтып келе жатқанда пойыздан Арал көріне бастағанда жүрегім соғысқа кіріп жатқандай тарсылдап соғатын. Сол жақта жүру маған соғыстай жүргендей болды. Ол жерде ешкім соғысып жатқан жоқ. Бірақ қаталдықты көрмегенмін ғой. Солай күйзелісте болдым. Бірақ олардың болмысы сондай еді. Оларды да кінәлай алмаймын. Қиын болғаны рас. 2 жылда 20 келі тастап келгенім бар», — деді әнші.
Жазира Байырбекова отбасындағы келіспеушіліктер салдарынан кетуге бел буған кездері болғанын да жасырмады.
«Арасында мен «Болды, кетемін» деген кез болды. Баламды алып, бәріміз пойызға отырдық. Жолда 2 сағат бойы ойланып келдім. «Қазір үйге қалай кіремін? Әке-шешемнің көңілі түсетін болды ғой. Қай бетіммен барамын? Өзім тауып, ғашық болып таңдаған күйеуім ғой» деп ойладым. Аралдан Қазалыға жетер кезде «Апа, үйге қайтайықшы, осы жерден түсіп қалайықшы» дедім. Апам баланы қолға алып, «уф» деді. «Сен Жанболатқа сенбе, өзің көнемін десең түсеміз» деді. Сол кезде түсіп, қайтадан үйге қайттық. Сол барғаннан қалдым. Бірақ сол күннен кейін көп нірсе өзгерді. Мен басылдым, еркелігімді қойдым», — деді Байырбекова.
Ақпарат nur.kz сайтынан алынған.