Жыл сайын жүргізілетін Дүниежүзілік бақыт баяндамасы (World Happiness Report) деректері бойынша Қазақстан Өзбекстаннан – 10, Ресейден – 13, Қырғызстаннан – 32 орынға алға шығып, 43-ші орынға табан тіреді, деп хабарлайды ozgeris.info сайты ҚазАқпаратқа сілтеме жасап.
Осылайша, еліміз ТМД-ға мүше мемлекеттер рейтингінде ең бақытты ел ретінде танылып, көш бастап тұр.
2024 жылы Қазақстан аталған тізімде 49-шы орында болған. Дүниежүзілік бақыт баяндамасы — 140-тан астам елдің деректері негізінде жасалатын және жыл сайын Gallup, Біріккен Ұлттар Ұйымы, Оксфорд университеті жариялайтын рейтинг.
— Бақыт деңгейі объективті деректерді — жан басына шаққандағы жалпы ішкі өнім, әлеуметтік қолдау, салауатты өмір сүру ұзақтығы, еркіндік, жомарттық және сыбайлас жемқорлыққа қарсы көзқарасты назарға ала отырып, әлемдік Gallup сауалнамасы негізінде ел тұрғындарының субъективті бағалауын ескеретін бірнеше критерий бойынша анықталады. Мұнда респонденттер өз өміріне көңілі толу деңгейін 0-ден 10-ға дейінгі көрсеткіш негізінде бағалайды, — делінген құжатта.
Айта кетейік, Премьер-министр Олжас Бектеновтің Мемлекет басшысы Қасым-Жомарт Тоқаевтың ел тізгінін қолға алғанына алты жыл толуына орай жуырда жарық көрген мақаласында 2019 жылдан бері ел халқының өмір сүру ұзақтығы 73-тен 75 жасқа дейін артқанын атап өтті. Жалпы, өлім-жітім — 7,8%-ға, аналар өлімі — 26,3%-ға, бала өлімі — 15,8%-ға төмендеді.