Қазақстан Республикасының Бас прокуратурасы аса ірі көлемде алаяқтық жасады деген күдікпен Қазақстан азаматын Қырғыз Республикасынан экстрадициялады деп хабарлайды Ozgeris.info тілшісі gov.kz порталына сілтеме жасай отырып.
Тергеу мәліметінше, 2023 жылғы маусым айында күдікті алдын ала сөз байласқан адамдар тобымен бірге Алматы қаласындағы банктердің бірінде клиенттердің атынан олардың банктік шоттарына тіркелген абоненттік нөмірлерді өзгерту туралы жалған хабарламалар жолдап, сол арқылы банк жүйесіне қол жеткізген.
Нәтижесінде ол қашықтан басқару арқылы бес жәбірленушінің шотынан үшінші тұлғалардың, яғни “дропперлердің” есепшоттарына қаражат аударып, оларды иемденген. Келтірілген материалдық шығын 230 миллион теңгеден асады.
2024 жылғы қаңтарда күдікті Бішкек әуежайында ұсталып, Қазақстан Бас прокуратурасының сұранысы негізінде отанына экстрадицияланды. Қазіргі уақытта ол уақытша ұстау изоляторына қамалды.
Аталған қылмыс бойынша оның мүлкін тәркілей отырып, бес жылдан он жылға дейін бас бостандығынан айыру жазасы қарастырылған.