Тоқтар Серіков ұстазы Алтынбек Қоразбаевқа қатысты естелігімен бөлісті, деп хабарлайды Caravan.kz.
Әнші “Жақсы адамдарым” бағдарламасында ұстазына алғыс айтып, көзіне жас алды.
”Мен консерваторияда бірінші курста оқимын. Көкемнің бір серілігі болатын. Ол серілікті сол кезде өмірімде бірінші рет көрдім, одан кейін көрген жоқпын. Жаңа жылға екі күн қалғанда мені қасына ертіп алды. Екі күн қасында жүрдім. Бүкіл достарын араладық. Көкем де, мен де шаршадым. Екінші күні бір үйден шығып бара жатқан кезде көкем аяқ киімін киіп жатыр екен. Еңкеюге шамасы жоқ. Содан апыр-топыр еңкейіп көкемнің аяқ киімін кигіздім. Сол жерде көкем басымды сипап тұрып, құлындарым, сендер мені паналап жүрсіңдер ғой, мен сендерге пана бола аламын ба екен деді. Жылағаныма айып етпеңіздер,ол уақытта менің тағдырым шешіліп тұр ғой. Сол жерде ішімнен көке, сенің атыңды қайтсем шығарамын деп серт бердім. Тәубә, құдайға шүкір”, — деді өнер иесі көзіне жас алып.
Желі қолданушылары Алтынбек Қоразбаевтың бұл сөзді мас хәлде айтқанын болжауда.
”Алтекең мас кезімде не айттым деп отырған шығар”, “Осы әңгімені көп жерде айтып жүрсің ғой, кезінде ұстазың хабарласқанда неге телефон алмай жүрдің соны да айта жүрсей”, “Керемет естелік, бірақ аяғында зорға тұрды дегенді айтпай-ақ қою керек еді”, — деп жазды олар.