Қазақстандағы моноқалалардың өнеркәсіптік даму әлеуеті күннен күнге артып келеді. Бұл туралы бірінші вице-премьер Роман Скляр айтты.
Екібастұз қаласында «Railways Systems KZ» компаниялар тобы теміржол машинасын жасау саласындағы ең заманауи жабдықтарды өндірудің жетінші желісінің құрылысын белсенді жүргізуде. Бұған дейін кәсіпорын Екібастұз қаласында теміржол саласы үшін 6 өнім түрін шығарған.
Саран қаласында бұрынғы резеңке-техникалық бұйымдар (РТБ) зауытының негізінде бірқатар өндірістер құрылды. Олардың арасында сынақ режимінде өнім шығара бастаған шина зауыты да бар. Бұл ретте Қазақстанда бұл өнім 2000 жылдан бері шықпаған. Бірінші вице-премьердің айтуынша, маусым айында алғашқы өндіріс басталады және биыл қалада 1 млн ең заманауи шиналар шығарылады.
«Өңдеуші өнеркәсіптің дамуы еліміздің экономикасын өзгертіп қана қоймай, моноқалалардың өміріне де өзгерістер енгізіп жатыр. Мен Екібастұзды бекерге мысалға келтірген жоқпын. Бүгінде онда ірі машина жасау кластері дамып келеді және теміржол машинасын жасау өнімдерінің 72%-ы өндіріледі. Маусым айында ГРЭС-1 алаңының жанындағы ең ірі ферроқорытпа зауыты өз жұмысын бастайды. Саран қаласында бұрынғы РТБ зауытының базасында жаңа кәсіпорындар салынды: шина зауыты, шағын торапты құрастыру әдісімен автобустар шығаратын QazTehna, тұрмыстық техника шығаратын зауыт бар», – деді Скляр.
Оның айтуынша, түзу дәнекерленген құбырлар шығаратын кәсіпорын да салынып жатыр. Қазірдің өзінде моноқаланың өзі жаңа өмірге қалай бейімделіп, түрленіп жатқанын көруге болады.
«Бұрын тұрғындары тастап кеткен үйлер енді бос емес, күрделі жөндеу жұмыстары жүргізілуде. Үкімет бұл бағыттағы жұмысты жалғастыратын болады. Жергілікті қамту үлесін арттыру және инвестиция тарту жастар үшін жоғары өнім өндіретін, жақсы ақы төленетін жұмыс орындарын ашуға мүмкіндік береді. Бұл – басты міндет», – деп атап өтті Роман Скляр.
Роман Склярдың сөзінше, экспорттық әлеуетті арттыру, импортты алмастыру, бюджетке түсетін салықтар, жұмыс орындарының ашылуы жүйелі түрде жүзеге аспақ. Яғни, бұл бәрін өзімен бірге ілестіріп әкететін тұтас бір локомотив.