Қазақстанның еңбек сіңірген жаттықтырушысы Тұрсынғали Еділов отандық былғары қолғап шеберлеріне кәсіпқой бокста жетістікке жету неліктен қиын екенін түсіндіріп, үш басты себебін атады, деп хабарлайды ozgeris.info, Telegram желісіндегі «Дядя Ваня» арнасына сілтеме жасап.
«Бірінші себеп – біздің көп боксшымыз кәсіпқой боксқа ауысады, бірақ оларды ол жақта ешкім күтпейді. Жетістікке жету үшін тәжірибелі промоутер керек, ол боксшыларды үлкен жекпе-жектерге шығара алады. Боб Арум немесе Оскар де ла Хойя секілді беделді ұйымдастырушылар аз, ал өзін кәсіпқойлар арасында сынап көргісі келетін боксшылар тым көп. Мұндай танымал промоутерлердің назарына ілігу де оңай емес. Екінші себеп – Олимпиада чемпионы әуесқой бокста үздік болса да, кәсіпқой рингте ол жаңадан бастаушы болып саналады. Бұл бағытта үздік атану үшін қан мен тер төгуің керек. Шетелде боксшыларды олардың көрерменді қызықтыра білуімен таңдайды. Өкінішке қарай, қазіргі әуесқой бокста бұл элемент барған сайын азайып келеді, бұл тенденция қазақстандық боксшыларға да тән. Үшінші себеп – бізге қазақстандық боксшыларды әлемдік деңгейде ілгерілететін беделді отандық промоутер қажет. Болашақта бұл рөлді Геннадий Головкин атқара алуы мүмкін деп ойлаймын. Ол кәсіпқой бокстың барлық қыр-сырын жақсы біледі және беделді тұлғалармен жеке таныс», — деді Тұрсынғали Еділов.
Ақпарат nur.kz сайтынан алынған.