Таиландтың ішкі істер министрі Анутин жойқын зілзала кезінде опырылып құлаған 30 қабатты ғимаратқа қатысты тергеудің нәтижесі жеті күн ішінде белгілі болатынын мәлімдеді. Бұл туралы Lianhe Zaobao басылымы хабарлады.
30 наурыз күні Анутин арнайы тергеу комиссиясы құрылғанын, тексеру жұмысы жеті күн ішінде аяқталатынын айтты.
— Таиланд тез арада ғимараттың құлау себебін анықтайтын болады, — деді ол.
Басылымның жазуынша, Таиланд Ұлттық аудит агенттігінің Бангкокта салынып жатқан жаңа кеңсесі (30 қабатты) 28 наурыз күні Мьянмадағы жойқын жер сілкінісі кезінде опырылып түскен.
Белгілі болғандай, бұл жобаға бюджеттен 2,1 миллиард бат бөлінген, ал құрылыс келісімі Таиландтың Ұлттық аудит агенттігі және Италия–Таиланд даму консорциумы мен Қытай теміржол құрылыс корпорациясының оныншы бюросы арасында жасалған.
Таиландтағы Қытай елшісі Хань Чжицян 30 наурыз күні Қытайдың Төтенше жағдайлар министрлігінің сарапшыларымен бірге Анутинмен кездесті.
Кездесуден кейін Анутин қытайлық сарапшылардың құлаған ғимараттың орнын көзбен шолып қайтқанын айтты. Ол сондай-ақ қытайлық мердігерлерге оқиға орнына кіруге рұқсат берілмегенін атап өтті.
— Жер сілкінісінің қуаты 7,8 балға жеткенмен, Бангкоктағы ғимараттардың 95%-дан астамы аман қалды. Тек Ұлттық аудит агенттігінің ғимараты ғана жермен-жексен болып қирады. Бұл — жаңа ғимарат, сондықтан жер сілкінісіне шыдауға тиіс еді, — деді Анутин.
Оның айтуынша, тергеу сәулетшіге, қадағалаушыға және мердігерге бағытталады. Құрылысқа жауапты тай және қытай компаниялары өз міндеттерін орындамағаны үшін жауапкершілікке тартылуға тиіс.
Сондай-ақ, төрт қытай азаматының зілзаладан кейін қиранды маңындағы контейнерден 32 құжатты алып кетпек болғаны анықталған. Басылымның хабарлауынша, Бангкок полиция басқармасы басшысының орынбасары Напо олардан жауап алынғанын хабарлады.
Оның айтуынша, Қытай азыаматтарының жұмыс рұқсаты бар және олар Италия–Таиланд даму консорциумына тиесілі компанияда жұмыс істейді.
Напоның берген ақпаратына сәйкес, бұл құжаттарда бас мердігер мен қосымша мердігерлер туралы егжей-тегжейлі мәліметтер болған. Полиция құжаттарды тәркілеп, Қытай азаматтарын сұрақтан кейін босатқан.
Қытай азаматтары полицияға берген түсініктемелерінде құжаттарды сақтандыру төлемдеріне өтініш дайындау үшін алып кетпек болғанын айтып ақталған.