Қарағанды облыстық полиция басқармасы бастығының экс-орынбасары айғақ затқа қатысты оқиғадан кейін тергеуге алынды, деп хабарлайды Ulysmedia.kz.
Бұған дейін әлеуметтік желілерде Қарағанды қаласында полиция қызметкерлері, оның ішінде жедел-тергеу тобының өкілдері қоршаған аумақтағы қылмыс орнынан жауынгерлік тапаншаның ұрланғаны туралы ақпарат тараған.
Оқиға Қарағанды қаласының орталығында екі жүргізушінің жанжалынан басталған. Олардың бірі екіншісінің көлігінің терезесін қаруға ұқсасі затпен сындырып, кетіп қалған. Жәбірленуші дереу полиция шақырып, заң бұзушы ұсталды. Оқиға орнына жедел-тергеу тобы да келген. Тапаншаға ұқсас зат тәркіленіп, тәртіп сақшылары оны мәшіннің алдыңғы жағына қоя салады.
Бұдан кейін ұсталған адам өзінің туысы, Қарағанды облыстық полиция басқармасы бастығының бұрынғы орынбасары Рысқали Жазықбаевқа телефон соғып, көмек сұрайды. Жазықбаев бірнеше жыл бұрын зейнетке шыққан. Ол әріптестерінен туысын босатуды және тапанша туралы тіс жармауды өтінген. Бірақ полиция қызметкерлері оның өтінішін орындаудан бас тартады. Жазықбаев полиция департаментінің басшылығына шығып, жағдайды түсіндіреді. Ол жақтан да ештеңе шықпайды.
Ары қарай оқиға орнына ұсталған жігіттің достары мен жақын адамдары келіп, у-шу басталады. Бәрі жан-жаққа тараған кезде полицейлер “капотта” жатқан тапаншаның жоқ екенін байқайды. Бейнекамерадағы жазбаны көріп шыққан сақшылар келген адамдардың бірі қаруды алып кеткеніне көз жеткізеді. Құқық қорғау қызметкерлері Жазықбаевқа қоңырау шалған соң тапанша қайтарылған. Ол кезде қару атылмайтын, жарамсыз күйде болады. Ал ақауы бар, істемейтін қаруды өзіңмен алып жүру қылмыс емес. Бұл жағдайда ұсталған жүргізушінің әрекетінде ешқандай қылмыстық құрам жоқ.
Бірақ әріптестері подполковник Жазықбаев жауапкершіліктен жалтарып кете алмады, соттың шешімімен ол 10 тәулікке қамауға алынып, қылмыстық іс қозғалды. Қазір тергеу жүріп жатыр. Ал айғақ затты көз алдында жоғалтып алған жедел-тергеу тобының өкілдері өз міндетіне салғырт қарағаны үшін қызметтерінен босатылды.