Алматы әкімдігі өзінің жақсы атын шығару үшін 44,6 миллион теңге жұмсамақ. Бұл қаржыны бар-жоғы екі айдың ішінде жарату керек, — деп жазады ozgeris.info тілішісі kursiv.media телеграм арнасына сілтеме жасап.
Бөлінген ақшаға қала билігі әлеуметтік желілер мен БАҚ-та PR жүргізеді. Олар медиа-жоспар дайындап, қазақ немесе орыс тілінде 108 материалды орналастырады. Материалдар PR және «жарнама» белгілерінсіз Instagram және Telegram желілерінде жарияланады.
Әкімдікпен шарт жасасу үшін Instagram-да миллионнан астам, ал Telegram арнасында 20 мыңнан астам оқырман болуы керек.
Жұмыс 2024 жылдың 31 желтоқсанына дейін аяқталуы тиіс. Жеңімпаз әлі анықталған жоқ.
Айта кетейік, Алматы әкімдігі Ерболат Досаевтың есімі қай жерлерде аталғаны туралы мониторинг жүргізіп жатыр деген хабар тараған еді. Алайда әкімнің өзі мұны жоққа шығарды.
Досаев жиі сынға ұшырайтын әкімдердің бірі. Қыркүйек айының басында алматылықтардың бірі әкімнің алдына бару мұң екенін, оны тек концерттерден «ұстап алуға» болатынын айтқан.
Ал бұған дейін ол ауласынан қоқыс жәшіктерін алып тастауды өтінген алматылық әйелмен сөзге де келіп қалған еді. Мәселенің шешімі ретінде әкім қоқыс жәшігін тұрғынның үйінен әрі қою үшін арнайы өзі жүріп халықтан қол жинайтынын айтқан.