Астаналық №1 Т. Бигелдинов атындағы мектеп-лицейде сабақ уақытында цирк шарасы өткізілді, деп хабарлайды ozgeris.info.
Ата-аналардың айтуынша, мектеп әкімшілігі цирк труппасына акт залын жалға беріп, оқушыларды сабақ уақытында шоуға жіберуге рұқсат еткен. Цирк қызметкерлері балаларды тегін фотосессиямен – питон мен қолтырауынмен суретке түсу мүмкіндігімен қызықтырған.
Мектеп оқушысының әкесі Жан Нұрбеков бұл жағдайға наразылығын білдірді:
«Сабақ уақытында мұндай шараларды өткізу қаншалықты дұрыс? Оқушылар білім алудың орнына шоуға қатысады. Менің ұлым білім алу үшін мектепке барады, шоу үшін емес. Оған қоса, мұндай іс-шаралар мектепте бірнеше рет өткізілді,» – деді ол.
Кейбір ата-аналар қауіпті жануарлардың мектепке әкелінуіне алаңдаулы.
«Санитарлық талаптарға сай ма? Оқушылардың қауіпсіздігі қаншалықты ескерілген?» – дейді олар.
Бұл жағдай ата-аналардың ғана емес, қоғамның да алаңдаушылығын тудырды. Естеріңізге сала кетейік, биыл Сенат төрағасы Мәулен Әшімбаев қазақстандық оқушылардың білім деңгейі ОЭСР елдерімен салыстырғанда үш жылға артта екенін айтқан болатын.