Ауыл шаруашылығы министрлігі Россельхознадзордың Қазақстан астығының Ресей аумағы арқылы транзитіне қатысты мәлімдемесіне жауап берді. Бұған дейін Россельхознадзор Қазақстаннан кейбір өнімдердің импортына енгізілген шектеулердің әлі де күшінде екенін хабарлаған.
«Қазіргі уақытта 2024 жылғы 17 қазанда енгізілген Қазақстаннан Ресейге бидай, жасымық және майлы зығыр тұқымдарын әкелуге уақытша шектеулер сақталуда. Алайда бұл шектеулер Қазақстан тарапының фитосанитарлық сертификаттарды тікелей түпкілікті межелі елге рәсімдеуі және астықтың теміржол вагондарынан кеменің қоймаларына тікелей ауыстырылуы жағдайында осы өнімдердің транзитіне қатысты қолданылмайды», – деп нақтылады Россельхознадзор.
Транзит тек белгілі бір теңіз порттары арқылы жүзеге асырылады, олардың инфрақұрылымы астықты кемеге тікелей тиеуге мүмкіндік береді және Ресей аумағында карантиндік зиянкестердің таралу қаупін болдырмайды.
«Ресейде бидай, жасымық және майлы дақылдарды импорттауға уақытша шектеулер бар. Алайда бұл өнімдер бойынша Ресей өз қажеттіліктерін толық қамтамасыз ететіндіктен, ол Қазақстандық өндірушілер үшін негізгі нарық болып табылмайды. Осы мәселені реттеу жөніндегі келіссөздер Мемлекеттік инспекция комитеті мен Россельхознадзор өкілдерінің қатысуымен тұрақты түрде жүргізілуде», – деп мәлімдеді ҚР Ауыл шаруашылығы министрлігі.