Қазақстандықтардың көпшілігі елдің даму бағытын оң бағалайды – ҚСЗИ сауалнамасы

Қазақстан стратегиялық зерттеулер институтының тапсырысымен жүргізілген сауалнама нәтижесіне сәйкес, қазақстандықтардың 73,3 пайызы елдің даму бағытын дұрыс деп есептейді. Мемлекеттік бастамаларды ең көп қолдайтындар – жастар (18–29 жас) – олардың 82 пайызы ел дамуымен келіседі. Әйелдердің 75,3 пайызы елдің даму жолына оң баға берсе, ерлер арасында бұл көрсеткіш 71,1 пайызды құрайды деп хабарлайды ozgeris.info сайты Tengrinews.kz порталына сілтеме жасай отырып. Президентке деген сенім де жоғары деңгейде – ел тұрғындарының 76,4 пайызы Мемлекет басшысына сенетінін айтқан. Бұл көрсеткіш жастар арасында – 84,6 пайыз, әйелдер арасында – 78,1 пайыз (ерлер – 74,5 пайыз). Ауыл (76,8%) мен қала (76,1%) тұрғындарының сенім деңгейі шамалас. Сауалнама елдің болашағына деген үміттің де жоғары екенін көрсетті: респонденттердің 60,8 пайызы алдағы бес жылда елдің дамуы оң болады деп санайды. Сонымен қатар, азаматтардың 57,3 пайызы өміріне толық қанағаттанатынын айтса, 32,8 пайызы көбіне қанағаттанатынын білдірген.