Астана қаласында маңызды қоғамдық жобаның тұсауы кесілді. "Жаңа адамдар" және "Дала Қырандары" қозғалыстары бірігіп "Адал азамат" мектебін ашты. Жаңа жоба болашақ көшбасшылар мен мықты сарапшыларды тәрбиелеуді көздеп отыр. Таныстырылымға бұқаралық ақпарат құралдары, жастар ұйымдары, спорт федерациялары мен клубтарының өкілдері қатысты. Сондай-ақ еліміздің әр аймағынан келген белсенді жастар бас қосты, деп хабарлайды ozgeris.info сайты.
Жаңа бағдарламаның басты қағидаты "Мәселе менде" деп аталады. Мұнда адам тәрбиеленетін нысан емес, жеке дамитын тұлға ретінде бағаланады. Оқу орнының жұмысы меритократия, ашық диалог, жеке жауапкершілік және жасампаз патриотизм негізінде құрылған. Бағдарламаға қатысу толықтай тегін. Үміткерлерді іріктеу кезінде ұйымға мүше болу талап етілмейді. Ең бастысы үміткердің нақты тәжірибесі мен талпынысы есепке алынады.
"Жаңа адамдар" қозғалысының негізін қалаушы Асель Баденова бастаманың маңызына тоқталды.
"Бүгінде Қазақстанда үкіметтік емес ұйымдардың, қоғамдық бірлестіктер мен азаматтық бастамалардың өкілдерінен құралған белсенді жастар қауымдастығы қалыптасты. Ендігі қадам осы әлеуетті біріктіріп, түрлі саладағы реформаларды жүзеге асыра алатын жас көшбасшыларды даярлау. Сондықтан Жаңа адамдар және Дала Қырандары Қозғалыстары жас көшбасшыларды, сарапшыларды және Әділет партиясының кадрлық резервін даярлайтын Адал азамат мектебін іске қосады".
"Дала Қырандары" ұйымының үйлестірушісі Мейрболат Тоитов бұл қадамдардың заңды жалғасы екенін жеткізді.
"Бүгінде Қазақстанға осындай белсенді әрі жауапты жастар қажет. Дала Қырандары мен Жаңа адамдар осыған дейін Әділет партиясының жастар қанатын құру ниеті туралы мәлімдеді. Ал бүгін біз келесі қадамды жүзеге асырамыз. Елдің белсенді жастарын біріктіретін, тәжірибе алмасуға мүмкіндік беретін және кадрлық резерв даярлайтын мектепті ашамыз. Сондықтан Адал азамат мектебінің ашылуы осы уақытқа дейін атқарған жұмысымыздың заңды жалғасы. Біздің мақсатымыз қоғамға нақты пайдасын тигізетін, жауапты әрі тәртіпті көшбасшыларды тәрбиелеу".
Жобаның келесі үлкен кезеңі Алматы қаласында жалғасады. Тамыз айында "Әділетті Қазақстан үшін" атты жастар конвенті өтеді. Бұл туралы "Жаңа адамдар" қозғалысының баспасөз хатшысы Алпамыс Әбілов толық мәлімет берді.
"Келесі қадам Алматыда өтетін Әділетті Қазақстан үшін атты жастар Конвенті болады. Біз еліміздің түкпір-түкпіріндегі жастар ұйымдарын, азаматтық бастамаларды және белсенді жастарды осы ауқымды алаңға шақырамыз. Егер сіздер жауапкершілік алып, азаматтық жобаларды жүзеге асыруға, ел дамуына үлес қосуға және Әділетті Қазақстанды бірге құруға дайын болсаңыздар, тамыз айында өтетін Конвентте сіздерді күтеміз".
