«Қазақмыс» Тобы өз кәсіпорындарын техникалық тұрғыдан қайта жарақтандыру жұмысын жалғастырып жатыр. Жақында «Жыланды» және «Нұрқазған» кеніштеріне екі жаңа бұрғылау қондырғысы жеткізілді. Бұл заманауи «Sandvik DL431» маркалы машиналары жерасты жағдайында терең желдетпе ұңғымаларын қазуға арналған, деп хабарлайды ozgeris.info сайты.
Жаңа жабдық кеншілердің еңбек жағдайын айтарлықтай жақсартады. Бұған қоса тазарту блоктарын дайындауда өте жоғары дәлдікті қамтамасыз етіп жұмыс өнімділігін арттырады. Қондырғы әсіресе берік тау жыныстары кездесетін орындарды игеруде көп пайдаланылады. Мұндай күрделі жағдайда техниканың мықтылығы мен өндіріс үдерісінің тиімділігі шешуші рөл атқарады.
«Sandvik DL431» толық механикаландырылған электрогидравликалық құрылғы саналады. Ол кен өндіру жұмыстарына арнайы шығарылған. Машина диаметрі 64 миллиметрден 115 миллиметрге дейінгі ұңғымаларды бұрғылай алады. Оның барынша қазатын тереңдігі 54 метрге жетеді.
Құрылғы заманауи автоматтандыру жүйесімен толық жабдықталған. Мұнда жоғары дәлдіктегі позициялау қызметі мен операторға арналған өте ыңғайлы эргономикалық жұмыс орны қарастырылған.
Бұл машиналарды әкелу компанияның тау-кен техникасын жаңғыртуға бағытталған ауқымды бағдарламасының бір бөлігі болып саналады. Осы 2026 жылы кәсіпорын 22 заманауи қондырғы сатып алу үшін 9,9 миллиард теңге қаражат бөлді. Қазіргі уақытта жаңа техникалар өндірістік алаңдарға кезең-кезеңімен жетіп жатыр.
Техника паркін осылайша жаңарту кен өндіру ісінің сапасын еселей түседі. Жаңашыл технологияларды енгізу арқылы өндіріс орындарында толықтай қауіпсіз еңбек жағдайы жасалады.
