Қарағанды облысындағы Нұрқазған байыту фабрикасының жұмысшылары жақын арада жаңа әрі заманауи ғимаратқа ие болады. "Қазақмыс" корпорациясы өз еңбеккерлерінің жағдайын жақсарту мақсатында үлкен құрылысты бастап кетті. Бұл игі іске 2,39 миллиард теңге көлемінде қыруар инвестиция бөлініп отыр, деп хабарлайды ozgeris.info сайты.
Өндіріс басындағы маңызды шара жаңа блокты-модульді әкімшілік-тұрмыстық кешеннің іргетасына естелік капсула қалаудан басталды. Салтанатты жиынға "Қазақмыс корпорациясы" ЖШС Бақылау кеңесінің төрағасы Нұрмұхамбет Әбдібеков қатысты. Басшылық бұл жобаны қарапайым құрылыс емес, еңбек адамына көрсетілген зор қамқорлық деп бағалады. Қауіпсіз әрі жайлы орта қалыптастыру компанияның басты басымдығы болып қала бермек.
Сонымен қатар жиынға тау-кен өндірісі және байыту жөніндегі бас операциялық директор, басқарма төрағасы орынбасарының міндетін атқарушы Мұқан Үңгітбаев пен күрделі жобалар жөніндегі басқарушы директор Максим Даценко арнайы келді. Одан бөлек кәсіпорын жетекшілері, бас мердігер өкілдері және фабрика қызметкерлері осы тарихи сәттің куәсі болды.
Мерекелік шара барысында компания басшылары мен мердігерлер кешеннің болашақ қызметкерлеріне арналған арнайы үндеуге қол қойды. Маңызды құжат салынған капсула ғимараттың негізіне мықтап бекітілді. Оны ашу сәті нысан толық салынып біткен кезде жүзеге асады. Құрылыс жұмыстарын аяқтап, ғимаратты қолданысқа беру 2027 жылдың тамыз айына жоспарланған.
Жаңа екі қабатты ғимараттың жалпы аумағы 2400 шаршы метрден асады. Кешен бір мезетте 567 жұмысшыға қызмет көрсете алады. Осылайша ол өндірістік алаңдағы ең ірі әлеуметтік нысандардың біріне айналмақ. Іште санитариялық-тұрмыстық бөлмелер, кір жуу және медициналық блоктар орналасады.
Жұмысшылар үшін барлық жағдай жасалады. Онда жуынатын бөлмелер, арнайы киімді кептіретін орындар, автоматты кір жуу бөлімі және кең демалыс бөлмелері қарастырылған. Ал медициналық пункт ауысым алдындағы тексеруден бөлек, физиотерапия және түрлі ем-шара кабинеттерімен толық жабдықталады.
Бұл ғимарат корпорацияның инвестициялық бағдарламасы аясында бой көтеріп жатыр. Кәсіпорын өндірістік және тұрмыстық инфрақұрылымды дамытуға ерекше назар аударады. Мұндай ауқымды жұмыстар ең алдымен өнеркәсіптік қауіпсіздікті қамтамасыз етіп, жұмысшы мамандықтарының беделін арттыруға тікелей септігін тигізеді.
