«Пельмени» асханасының негізін қалаушы, белгілі кәсіпкер Санжар Әбдірахманов елден кету туралы ойлап жүргенін ашық айтты. Ол бұл шешімін Қазақстандағы бизнес жүргізуге қатысты қиындықтармен байланыстырды.
Кәсіпкердің айтуынша, билік тарапынан жасалған кедергілер оның елде қалуға деген ниетін сейілткен. Әсіресе, ол өзінің асханасының сыртында тұрған маңдайшадағы жыл көрсеткішіне салық салынғанына наразы.
«Біз ақымақтар елінде өмір сүріп жатырмыз. Кәсіптің негізін қалану жылын көрсету – жарнама деп саналып, салық салынатын елде тұрамыз. Мен шаршадым. Соттасуға да, мәселені шешуге де ниетім жоқ. Жай ғана сол жазуды алып тастаймын да, осы елден қалай кетуге болатыны жайлы көбірек ойлай бастаймын.
Барлығын заңды түрде істеп, салық төлеп, жұмыс орындарын құрып, экономиканы алға жылжытасың, бірақ билік бәрібір бір себеп тауып, кедергі келтіреді. Бизнесті қолдаудың орнына, оны тұншықтыруға тырысқандай әсер қалдырады», – деп мәлімдеді Әбдірахманов.
Кәсіпкерлердің елден кету туралы ойлауы – Қазақстан экономикасы үшін үлкен белгі. Егер бизнес ортадағы жағдай өзгермесе, мұндай үрдіс жалғаса беруі мүмкін.