Алматыда бес адамға жер берілді: тізімде облыс әкімінің анасы бар

Алматы қаласының әкімі Ерболат Досаев қалада бос жер тапшылығына қарамастан бес азаматқа жер телімін беру туралы шешім қабылдады. Бұл жағдай қоғамда үлкен резонанс тудырды, себебі жер алғандардың арасында Алматы облысының әкімі Марат Сұлтанғазиевтің анасы — 78 жастағы Гүлбахар Мансұрова да бар дее хабарлайды ozgeris.info сайты politico.kz сайтына сілтеме жасап. Гүлбахар Мансұрованың ұлы Қанат Сұлтанғазиев — «ДАМУ» қорының басқарушы директоры, ал кіші ұлы Марат Сұлтанғазиев — Алматы облысының әкімі. Мансұроваға берілген жер телімінің көлемі — 10 сотық. Қазақстан заңнамасына сәйкес, әрбір азаматтың үй салу мақсатында мемлекеттен 10 сотық жер алуға құқығы бар. Алайда Алматы, Астана және Шымкент қалаларында бос жер телімдерінің болмауына байланысты, қазіргі уақытта бұл қалаларда өтініш қабылдау тоқтатылған. Соған қарамастан, 2024 жылы Ерболат Досаев бес азаматқа жер беру туралы қаулыларға қол қойған. Бұл құжаттардың көбі alag.kz — Алматы қаласының Геоақпараттық порталында ашық түрде жарияланған. Учаскелер жеке тұрғын үй салу үшін 3–4 жыл мерзімге уақытша пайдалануға беріліп, кейін мемлекет меншігіне қайтарылуы тиіс. Жер алған азаматтардың ықпалды тұлғалармен туыстық байланысы және бір қаулының ашық дереккөздерде болмауы қоғамда бұл шешімдердің әділдігіне күмән тудырды. Әсіресе, жер телімдері бағасы 20–30 миллион теңгеге дейін жететін Есентай өзенінің жағасында орналасқанын ескерсек, бөліну тәртібі туралы әкімдік нақты түсініктеме бермеген. Қоғам белсенділері мен қала тұрғындары әкімдікке ресми сауал жолдап, жер телімдері қандай өлшемдерге сүйене отырып берілгенін ашық түсіндіруді талап етуде. Бұл жағдай Алматыдағы жер бөлу жүйесінің ашықтығы мен әділдігіне қатысты маңызды сұрақтарды күн тәртібіне шығарды.