Техникалық тексерістегі немқұрайлылық адам өліміне себеп болды

Қостанай облысында болған өлімге әкелген жол-көлік оқиғасы техникалық станция иесін жауапқа тартуға себеп болды, деп хабарлайды ozgeris.info. Оқиға тамыз айында орын алған. Mercedes-Benz жүргізушісі жаяу жүргіншіні қағып, оның оқиға орнында қайтыс болуына әкелді. Жүргізуші апаттан қашуға тырысқанын, бірақ тежегіштің жұмыс істемегенін мәлімдеді. Полицейлер тексеру барысында көліктің тежегіш жүйесінде ақау бар екенін анықтады. Бір дөңгелегінде тежегіш дискі мүлде болмаған. Ең сорақысы, бұл көлік апатқа дейін бес күн бұрын техникалық тексерістен өткен, бірақ анық ақауларға қарамастан, пайдалануға жарамды деп танылған. Сот шешімімен жүргізуші екі жылға бас бостандығынан айырылып, бес жылға көлік жүргізу құқығынан айырылды. Сонымен қатар, техникалық тексерісті жүргізген жеке кәсіпкер де жауапқа тартылды. Полицейлер жыл басынан бері осындай құқықбұзушылықтарды болдырмау үшін мемлекеттік органдарға мыңнан астам ұсыныс жібергенін атап өтті.