Тарихи жобаға қатысыңыз: Жошы хан туралы сериалға кастинг басталды

Жошы ханның өмірі туралы тарихи сериалға актерлер іріктелуде, деп хабарлайды ozgeris.info, besmedia сайтына сілтеме жасап. Сериалдың продюсерлік тобы 8-ден 60 жасқа дейінгі актерлер мен актрисаларды іздейді. Кастингке қатысушыларға қойылатын негізгі талаптар – шабандоздықты меңгеру, ағылшын тілін еркін меңгеру және түркі, орталықазиялық немесе шығысазиялық келбетті болу. Кастингке қатысу үшін үміткерлер резюме, өздері туралы бейнематериал (бой, салмақ, жасын көрсете отырып) және байланыс ақпаратын casting@karga7.com электронды поштасына 2024 жылдың 1 желтоқсанына дейін жіберуі қажет.

Жобаның ерекшелігі:

Бұл сериал Қазақстан тарихындағы маңызды тұлға – Жошы ханның өмірі мен оның Алтын Орда империясын қалыптастырудағы рөлін баяндайды. Жоба ағылшын тілінде түсіріледі және құжатты әрі драмалық элементтерді үйлестіреді. Сериалды түсіру Karga Seven Pictures компаниясына жүктелген. Бұған дейін олар Netflix үшін "Османдар: Империяның көтерілуі" және "Мұса пайғамбар" сияқты жоғары рейтингті жобалар түсірген. Түсірілімдер Қазақстан, Түркия және АҚШ елдерінде өтеді. Жобаның режиссері – Эмре Шахин. Бұл сериал Жошы Ұлысының 800 жылдығына орай әзірленіп, қазақ халқының бай мәдени мұрасын халықаралық аудиторияға танытуды көздейді.