Солтүстік Қазақстан облысында қайғылы жол апаты салдарынан екі учаскелік полиция инспекторы қаза тапты, деп жазады ozgeris.info сайты.
6 қыркүйекте Чистополь – Шөптікөл бағытындағы тасжолда Chevrolet Cobalt пен Toyota Camry көліктері соқтығысып, екі адам оқиға орнында жан тапсырған.
СҚО Полиция департаменті таратқан ақпаратқа сәйкес, марқұмдар – қызметтік міндетін орындап жүрген полиция қызметкерлері. Олардың апат кезінде ішімдік ішпегені нақтыланды. Оқиғаға байланысты қылмыстық іс қозғалып, тергеу жүргізілуде.
Қаза тапқандар:
– полиция майоры Владимир Синицын,
– полицияның аға лейтенанты Даулетхан Қазыхан.
Ішкі істер министрі Ержан Сәденов қаза болғандардың отбасына көңіл айтып, қажетті қолдау көрсетілетінін жеткізді. Министр олардың есімдері ішкі істер органдары тарихында сақталатынын атап өтті.
