"Қан кетуін тоқтатқан": Лифтідегі баланы аман алып қалған көрші-дәрігер туралы дерек шықты

Астанадағы лифтте пышақ жарақатын алған 5 жасар баланың өмірін дәрігер көршісі құтқарып қалған, деп хабарлайды ozgeris.info сайты. Бұған дейін Астанадағы тұрғын үй кешендерінің бірінде кәмелетке толмаған жасөспірім лифт ішінде 5 жасар балаға шабуыл жасап, бірнеше пышақ жарақатын салғаны туралы жазған едік. Қылмыстан кейін жасөспірім оқиға орнынан қашып кеткен. Зардап шеккен баланың анасы бірден көмек сұрап дәрігер болып жұмыс істейтін көршісіне жүгінген. Көршісі – Астанадағы №1 қалалық аурухананың дәрігері, 13 жылдық тәжірибесі бар хирург-эндоскопист Жандос Ахнаев болып шықты. Дәрігер шұғыл әрі кәсіби түрде алғашқы медициналық көмек көрсетіп, қан кетуді тоқтатып, жедел жәрдем бригадасы келгенше баланың жағдайын тұрақтандырған.