Қазақстандық 19 жастағы семсерлесуші Нурмухаммед Жайлыбай ел спорты тарихында жаңа белеске шықты. Ол жасөспірімдер арасындағы әлем чемпионатында Қазақстан үшін алғаш рет жүлде алып, тарихи нәтижеге қол жеткізді деп хабарлайды ozgeris.info сайты.
Әлемдік дода Бразилияда өтті. Қазақстандық спортшы жеке сайыста қылыш (сабля) бойынша өнер көрсетіп, қола медаль иеленді. Бұл — Қазақстан үшін осы санаттағы алғашқы медаль болып отыр.
Жайлыбай жарысты 1/64 кезеңінен бастап, бірқатар мықты қарсыластарын сенімді түрде жеңіп шықты. Ол Жапония, Венгрия, Сенегал, Ресей және АҚШ спортшыларынан басым түсіп, жоғары деңгейдегі шеберлігін көрсетті. Алайда жартылай финалға жолдама беретін шешуші кездесуде Түркия өкіліне есе жіберді. Кейін дәл осы қарсыласы турнир жеңімпазы атанды.
Спортшының өзі бұл жетістіктің оңай келмегенін атап өтті. Оның айтуынша, ең қиын сәт — жартылай финалға шығу үшін өткен жекпе-жек болған. Сол кезде қысым жоғары болып, жауапкершілік күшейген. Дегенмен ол өз эмоциясын бақылап, нәтижеге жеткенін жеткізді.
«Әлі күнге дейін жүлдегер атанғаныма сене алар емеспін. Бұл — керемет сезім. Ең қиын сәт — жартылай финалға шығу үшін болған кездесу болды. Қысым өте жоғары еді. Бірақ өзімді қолға алып, жеңіске жеттім. Барша қолдау білдірген жандарға алғыс айтамын», — деді спортшы.
Айта кетейік, бұл — Қазақстанның семсерлесу тарихындағы жасөспірімдер арасындағы әлем чемпионатында қылыш түрі бойынша алғашқы жеке жүлде.
