Атырауда 10 жасар бала бассейнге батып кетті

Атырауда "Мұнайшы" стадионындағы бассейнге батып кеткен 10 жасар бала көз жұмды. Қазір кешенді тергеу басталды, деп хабарлайды Ozgeris.info. Оқиға 14 шілде сағат 16:30 шамасында болған.

"Атырау қаласындағы „Мұнайшы“ стадионындағы бассейнге 10 жасар бала батып кетіп, қайтыс болды. Қазір аталған оқиғаға байланысты қылмыстық іс тіркелді. Сот-медициналық сараптама тағайындалды. Полиция қызметкерлері кешенді тергеу амалдарын жүргізуді бастады. Өзге ақпарат тергеу мүддесіне сәйкес жариялауға жатпайды", - деп хабарлады департаменттің баспасөз қызметі.

"Мұнайшы" стадионындағы бассейніне 2019 жылы қайта жаңғырту жүргізілген. Бассейндегі олимпиадалық стандартқа сәйкес 8 жолаққа бөлінген жүзу жолының ұзындығы — 50, ені — 21, ал тереңдігі 2 метрден асады. Бассейн 2020 жылы сенімді басқаруға берілген. Мұнда 600-ден астам бала су спортымен айналысуға келеді.