Прокуратура елордасында ЖК «Оазис», МЖК «R-Club» және «R-Club Deluxe» бойынша тергеу аяқталғанын хабарлады. Іс заңсыз қаржы жинауға байланысты деп хабарлайды ozgeris.info сайты.
Тергеу мәліметі бойынша, топ құрылысқа қажетті рұқсаттарсыз қаражат жинаған. Соның нәтижесінде 426-дан астам отбасы зардап шеккен. Жалпы шығын 8,2 млрд теңгеге бағаланған.
Тергеушілер анықтағандай, жинаған қаражат мақсатсыз пайдаланылып, ғимараттар да ережеге сай салынбаған.
Зардап шеккендерге өтем жасау мүмкіндігін қамтамасыз ету үшін сот күдіктілердің мүлкін қамауға алды: 10 пәтер, 36 жер учаскесі, 16 коммерциялық нысан және 49 автокөлік. Қазір 12 күдікті қамауда отыр.
