ПИК (ОСИ) төрайымының адвокаты Дәурен Есламбекұлы қылмыстық істі заң бұзушылықтарды жою және қосымша тергеу жүргізу үшін прокурорға қайтаруды сұрайды, деп хабарлайды Ozgeris.info.
Қорғаушының пікірінше, іс материалдарында күдіктінің әрекеттері немесе әрекетсіздігі мен орын алған салдар арасындағы себеп-салдарлық байланысты қосымша анықтау қажет.
«Соттан осы өтінішхатты қанағаттандыруды және қылмыстық істі қылмыстық-процестік заңнаманың елеулі бұзушылықтарын жою, қосымша тергеу жүргізу, сондай-ақ Жұбаниязованың әрекеттері мен әрекетсіздігі мен орын алған салдар арасындағы себеп-салдарлық байланысты анықтау бөлігіндегі тергеудің толық еместігін жою үшін прокурорға қайтаруды сұраймын», - деді ол.
Адвокаттың айтуынша, техникалық және қаржылық құжаттаманы сұрату, ғимараттың жай-күйіне бұрын жауапты болған тұлғаларды анықтап, олардан жауап алу, оның жай-күйін зерттеу және қосымша құрылыс-техникалық әрі қаржы-экономикалық сараптамалар жүргізу қажет.
Прокурор Саяжан Серікова қорғау тарапының өтінішхатына қарсы шықты. Ол соттың әлі қылмыстық іс материалдарын зерттеуге кіріспегенін және жәбірленушілерден жауап алу кезеңінде тұрғанын атап өтті.
Тараптардың сөзінен кейін судья өтінішхат бойынша шешім қабылдау үшін кеңесу бөлмесіне кетті.
Бұған дейін сотта қаза тапқан қыздың бұрынғы күйеуі Әдлет Зейнел жауап беріп, елордалық әкімдіктен алынған 20 миллион теңге туралы айтқан болатын. Ұлдана Мырзуанның анасы өз жауабында 4,5 миллион теңгені алу мән-жайын баяндады. Оның айтуынша, бұл ақша материалдық көмек ретінде емес, қарызға берілген, сондай-ақ ол қызының ауруханаға түскен күні туралы айтып жатып, көз жасына ерік берді.
Еске сала кетейік, 8 қарашада Астанада Тәуелсіздік даңғылында ғимараттың кірпіш қаптамасының бір бөлігі кондиционермен бірге құлаған еді. Оқиға салдарынан бес адам зардап шекті.
Олардың арасында зардап шеккендерге көмек көрсету үшін шақыру бойынша келген жедел жәрдем фельдшері Ұлдана Мырзуан да бар. Бойжеткен адамдарға көмектесіп жатқанда, оның үстіне екінші қабаттан кондиционер құлаған.
8 қарашадан бастап дәрігерлер оның өмірін сақтап қалу үшін күресіп, жағдайын тұрақтандыруға барын салды. Проблемалық жарақаттар өмірмен сыйыспайтын болып шықты.
