Ақтөбе облысының тұрғыны оңай табысқа сеніп, 2 млн теңгесінен айырылды. Ол Telegram-да жарияланған жарнамаға алданып қалған. Хабарландыруда «TikTok-та видеоға лайк басқан әр скриншот үшін 300-800 теңге табасыз» делінген.
Азамат сілтеме арқылы күмәнді сайтқа тіркеліп, тапсырмаларды орындай бастайды. Кейін админ «әр салған ақшаңа 30 % пайда түседі» деп сендірген. Осы сөзге иланып, ол ақшасын үздіксіз құя береді. Ақыры алаяқтар 2 млн теңгені қолды еткен. Қазір бұл іс бойынша тергеу жүргізіліп жатыр.
Мұндай алдау-арбау қазір жиілеп кетті. Әсіресе TikTok секілді әлеуметтік желілерге тәуелді жастар осындай тұзаққа оңай түседі. Сондықтан ата-аналар балаларға ақшаның оңай келмейтінін кішкентайынан айтып, қаржы сауатын арттыруға көңіл бөлуі тиіс.
Есте сақтайық: SMS-кодты ешкімге бермейміз. Бейтаныс сілтемелерге өтпейміз. Әлеуметтік желідегі уәдеге сене салмаймыз. Телефон арқылы берілген «командаларды» орындамаймыз. Жерде жатқан байлық болмайды, оңай табысқа жоламау керек. Әр ақпаратты тек ресми дереккөзден тексереміз.
