"Тергеу басталды": 17 бала тірідей өртеніп кеткен

Нигерияның солтүстік-батысында түн ортасында мектеп өртеніп, шырт ұйқыда жатқан 17 оқушы тірідей өртеніп кеткен, - деп хабарлайды ozgeris.info сайты "Хабар 24" телеарнасына сілтеме жасап. Мәліметке сүйенсек, қайғылы оқиға Замфара штатының Каура Намода ауданында болған. Денесін күйік шалған тағы 20-ға жуық бала ауруханаға жеткізілді.

"Әзірге өрттің шығу себебі белгісіз. Елдің Төтенше жағдайлар агенттігі тергеуді бастады", - деп жазылған мәліметте.

Нигерия президенті Бола Тинубу қайтыс болғандардың отбасына көңіл айтқан. Өрт кезінде мектепте 100-ге жуық бала болған.

"Түнгі 2-де қалың ұйқыда жатқанда есікті біреу қағып, "Өрт, өрт!" деп айғайлағанынан шошып ояндым. Жалма жан тұрып, далаға атып шықтық. Мектептің төбесі өртке оранған екен. Адамдар іштегілерді құтқарып жатты", - деген мұғалім Халифа Абубакар.