Жетісу облысына қарасты Текелі қаласында жан түршігерлік оқиға орын алды. Жергілікті тұрғын өзінің некелі жарын өмірден айырды. Сұмдық жағдай туралы ақпарат "Немолчи" қорының әлеуметтік парақшасында жарық көрді. Мәліметтерге сүйенсек Лидия есімді көпбалалы ана қазіргі уақытта тергеу изоляторына қамалған, деп хабарлайды ozgeris.info сайты.
Жетісу облыстық полиция департаменті қайғылы жағдайдың маусым айының 10-ы күні түнде болғанын хабарлады. Қырық бес жастағы ер адам алған пышақ жарақатынан көз жұмған. Тәртіп сақшылары бұл дерек бойынша қылмыстық іс қозғады. Алдын ала тергеу амалдары ерлі-зайыптылардың бірге спирттік ішімдік ұрттағанын анықтады. Осы отырыс барысында әйел адам күйеуіне өлімге әкелетін соққы жасаған. Сот күдіктіні күзетпен ұстау туралы шешім шығарды. Ол қазір Талдықорған қаласындағы уақытша оқшаулағышта отыр.
Қордың таратқан жазбасында Лидияның ұзақ жылдар бойы тынбай еңбек еткені жазылған. Ол балаларын ештеңеден тарықтырмай өсіруге тырысты. Ұрпақ тәрбиесімен айналысып отбасын жалғыз өзі асырап келді. Тұрмыстың ауыр тауқыметіне қарамастан перзенттерінің болашағы үшін барын салды.
Алайда бұл шаңырақтағы тыныштық ұзаққа созылмаған. Көршілері отағасы тарапынан жасалған зорлық-зомбылық әрекеттерді талай рет өз көздерімен көрген. Ер адам үйіне үнемі ішімдікке сылқия тойып келетін. Ол отбасы мүшелеріне айқайлап балағат сөздер айтып оларға үнемі қол көтерген. Көрші-қолаң бұл үйден тоқтаусыз шығатын айқай мен шуды балалардың жылаған дауысын жиі еститін.
Марқұм болған азамат жұбайын аяусыз соққыға жығып бала-шағасымен бірге көшеге қуып шығуды әдетке айналдырған. Тіпті қақаған қыс мезгілінде үйдің барлық терезелерін тас-талқан етіп шағып тастаған кездері де болған көрінеді.
