Салық заңнамасының жиі өзгеруі ұзақмерзімді инвестициялық жобалардың тұрақтылығына қауіп төндіріп отыр деп хабарлайды ozgeris.info сайты Nur.kz сайтына сілтемемен.
GRATA халықаралық заң фирмасының аға серіктесі Алмат Даумовтың айтуынша, бұл әсіресе тау-кен металлургия секторына әсер етуде. Салықтың күрт өсуі, роялтидің енгізілуі және ҚҚС мөлшерлемесінің артуы жобалардың болжамдылығын төмендетіп, инвесторлардың қызығушылығын азайтады.
Сарапшының пікірінше, инвестор үшін басты шарт – құқықтық және салықтық тұрақтылық. Қазір енгізіліп жатқан жиі өзгерістер 20–30 жылға жоспарланатын ірі жобаларды тиімсіз етуі мүмкін. ҚҚС өсімі де барлау жұмыстарымен айналысатын компанияларға қосымша салмақ түсіреді, себебі тәуекелі жоғары жобалардың шығыны артады.
Даумовтың айтуынша, тау-кен металлургия кешені қазірдің өзінде бюджетке ең көп салық төлейтін саланың бірі. Сондықтан жаңа салықтық жүктемелер қосымша инвестицияны тежейді, ал моноқалалардағы жұмыс орындарына қауіп төндіреді. Сонымен қатар, ережелердің тұрақсыздығы салықтық және инвестициялық дауларға әкелуі мүмкін.
Сарапшы Қазақстанға 1990–2000 жылдардағыдай ұзақмерзімді салық тұрақтылығын қайтару қажет деп санайды. Ол бизнес қауымдастығының қатысуымен кез келген реформаны алдын ала жан-жақты талқылауды және асығыс өзгерістерге тосқауыл қоюды ұсынады.
