Қазақстандық оқушылар ел тарихында бұрын-соңды болмаған ғаламат жетістікке қол жеткізді. Колумбияның Букараманга қаласында төртінші және он екінші шілде аралығында елу алтыншы Халықаралық физика олимпиадасы өтті. Осы беделді зияткерлік додада ұлттық құраманың барлық бес қатысушысы бірдей бас жүлдені қанжығасына байлап, бес алтын медаль жеңіп алды, деп хабарлайды ozgeris.info сайты.
Әлемнің сексен бес мемлекетінен келген үш жүз сексен бір оқушы бақ сынаған жарыс оңай болған жоқ. Үміткерлер терең білімді, ұшқыр ой мен нақты тәжірибелік машықты талап ететін күрделі теориялық және эксперименттік тапсырмаларды орындады. Біздің жастар осындай қиындықтарды еңсеріп, өздерінің мықтылықтарын дүниежүзіне дәлелдеді.
Тарихи жеңісті сыйлаған алтын құрам елордалық және алматылық жастардан жасақталған. Астана қаласындағы "NURORDA" мектеп-лицейінің он бірінші сынып оқушысы Нұргүл Егенбергенова және "Spectrum International School" мекемесінде он екінші сыныпта оқитын Ілияс Қазымбек топ жарды. Олармен бірге бас қаладағы физика-математика бағытындағы "NIS" мектебінің екі бірдей шәкірті жеңіс тұғырынан көрінді. Атап айтсақ он екінші сыныптан Әмірбек Азатбеков пен он бірінші сыныптан Дамир Құрман ел мерейін үстем етті. Алматылық жалғыз жеңімпаз Роман Черемнов "Мирас" халықаралық мектебінің он екінші сыныбында білім алады.
Дарынды жастарды бұл додаға мектеп мұғалімдері, тәлімгерлер мен ұлттық жаттықтырушылар тыңғылықты дайындаған. Дайындық жұмыстарына әл-Фараби атындағы ҚазҰУ аға оқытушысы және PhD докторы Гүлия Нұрбакова жетекшілік етті. Ал Колумбиядағы жарыс барысында "SDU" аға оқытушысы, PhD докторы Самат Мақсұтов пен физикадан халықаралық олимпиадалардың жүлдегері Әлішер Еркебаев ұлттық команданың жұмысын үйлестірді.
Бұл қазақстандық дарынды балалардың биылғы жалғыз жеңісі емес. Осыған дейін оқушыларымыз Ташкент қаласында өткен математика мен информатикадан әл-Хорезми атындағы халықаралық олимпиадада сегіз медаль жеңіп алған еді.
