Тараз қаласында №17 бағыттағы автобустың жүргізушісі мас күйінде көлік басқарғаны үшін жауапқа тартылды, деп хабарлайды ozgeris.info сайты, Жамбыл облыстық Полиция департаментінің мәліметіне сүйене отырып.
Оқиға «Қауіпсіз жол» атты жедел-алдын алу шарасы кезінде анықталды. Полицейлер күдік тудырған автобусты тоқтатып, жүргізушіні тексерді.
Медициналық сараптама нәтижесінде 55 жастағы жүргізушінің мас күйде екені расталды. ҚР ӘҚБтК-нің 608-бабының 1-бөлімі бойынша әкімшілік хаттама жасалып, сот шешімімен ол 15 тәулікке қамауға алынды және 7 жылға жүргізуші куәлігінен айырылды.
Полиция қызметкерлері атап өткендей, мас күйінде көлік жүргізу жол қозғалысы қауіпсіздігіне үлкен қауіп төндіреді және заң бойынша ауыр салдары бар.
