Тараз қаласының нөмірі екінші сотында бес адамға қатысты қылмыстық істі қарау басталды. Күдіктілерге бюджет қаражатын аса ірі көлемде қолды қылды деген айып тағылып отыр. Бұл күрделі істі Ұлттық қауіпсіздік комитетінің қызметкерлері тергеп тексерді. Аталған оқиғаның мән-жайын тілші Исламбек Дастан баяндады.
Сот залындағы айыпталушылар орындығына бірнеше бұрынғы лауазымды тұлғалар мен бизнес өкілдері отырды. Олардың қатарында Шымкент қаласының бұрынғы бас сәулетшісі Арман Әбдешов бар. Сондай-ақ Тараз қаласы әкімдігінің сәулет және қала құрылысы бөлімінің басшысы Алмасбек Бөбеев пен Шымкенттің тұрғын үй басқармасының жетекшісі Нұрбол Жүнісбеков жауапқа тартылуда. Олармен бірге кәсіпкерлік саласының өкілдері Қасиет Тәшімбетов пен Нұрбол Нұртаев та сотталып жатыр.
Тергеу нұсқасы бойынша Әбдешов, Бөбеев, Жүнісбеков және Тәшімбетов бюджет ақшасын сыртқа шығарудың жасырын жүйесін құрған. Мемлекет қаражаты түрлі операциялардың заңдылығын тек қағаз жүзінде ғана растайтын жалған құжаттар арқылы аударылып отырған. Ал бизнесмен Нұрбол Нұртаевқа ақша жылыстату бойынша қосымша айып тағылды. Ол ұрланған қаражатты тендерлік процедуралар мен қаржылық операциялар арқылы заңды ақшаға айналдырып отырған деп есептейді тергеушілер. Бұл туралы ozgeris.info сайты хабарлайды.
Бұл істе Арман Әбдешовтің тұлғасы жұртшылық назарын ерекше аударды. Ол 2025 жылдың ақпан айында Шымкенттің сәулет басқармасының тізгінін ұстаған болатын. Алайда арада бірнеше ай өткенде, яғни 2025 жылдың тамызында бөтеннің мүлкін иемденді деген күдікпен құрықталды. Сол тұста Шымкент әкімінің орынбасары Сәрсен Құранбек мәлімдеме жасап, тергеу амалдарының шенеуніктің Шымкенттегі қызметіне еш қатысы жоқтығын айтқан еді. Оның түсіндіруінше құқық қорғаушылардың қызығушылығы Әбдешовтің бұрынғы атқарған жұмыстарына байланысты туындаған.
Аталған мегаполиске келмес бұрын ол 2020 жылдан 2022 жылға дейін Жамбыл облысының сәулет басқармасын басқарған. Одан кейін 2023 жылдың соңына дейін Тараз қаласы әкімдігінде тиісті бөлімге жетекшілік етті. Қазіргі сот ісінде онымен бірге айыпталып жатқан бұрынғы әріптесі Алмасбек Бөбеев те Тараз қаласында бірге қызмет атқарған екен.
Әбдешовтің 2025 жылдың тамыз айында ұсталуы тағы бір шулы оқиғамен тұспа-тұс келді. Сол кезеңде Шымкент әкімінің орынбасарына қастандық жасау әрекеті бойынша үлкен сот процесі жүріп жатқан болатын. Сол атышулы істе әкімдікке қарасты Тұрғын үй Шымкент компаниясының директоры Ернар Жиембай айыпталушы ретінде өткен еді.
