Щучинск қаласында құтқарушылар қауіпті жағдайдың алдын алып, пәтерде қамалып қалған зейнеткер мен баланы аман алып шықты деп жазды ozgeris.info сайты.
Оқиға туралы 112 қызметіне хабар түскен. Әйел өз пәтеріне кіре алмай қалған, ал ішінде бес жасар бала мен жүріп-тұруы қиын зейнеткер қалып қойған.
Жағдайды күрделендірген жайт — пәтердегі балконның ашық болуы. Бұл бала үшін үлкен қауіп тудырған.
Құтқарушылар жедел әрекет етіп, арнайы альпинистік құралдардың көмегімен үшінші қабаттағы пәтерге балкон арқылы кірген. Кейін есікті іштен ашып, тұрғындарды құтқарған.
Мамандардың айтуынша, мұндай операциялар жоғары дәлдік пен кәсіби дайындықты талап етеді.
Оқиға салдарынан 1956 жылы туған әйел мен 2020 жылы туған бала аман қалды. Оларға медициналық көмек қажет болмаған.
