Түркістан облысы Бәйдібек ауданы мәслихатының 43 жастағы депутаты Ерғали Аманбаевтың аты тағы да дауға ілікті. Былтыр Шымкентте жол ережесін өрескел бұзып, қарсы жолаққа шығып кеткенімен есте қалған халық қалаулысы бұл жолы әлдеқайда ауыр қылмыс жасады деп айыпталып отыр, деп хабарлайды ozgeris.info сайты.
Halyqstan басылымының мәліметінше, Бәйдібек ауданының полиция басқармасына Алматы қаласының тұрғынынан шағым түскен.
-
Арызданушы әйел өзімен бірге Қытайдан келген төрт әлеуетті инвесторды Байжансай ауылына ертіп барған. Шетелдік кәсіпкерлер бұл аймақтағы қорғасын-мырыш кенін өндіру мүмкіндігіне қызығушылық танытқан.
-
Қонақтарды күтіп алып, оларға жолбасшы болған депутат Ерғали Аманбаев кейінірек олардың демалысын ұйымдастырған.
-
Шағымданушының сөзіне қарағанда, Аманбаев 34 жастағы Қытай азаматшасын өзінің Lexus көлігіне отырғызып, адамдардан оқшауланған иен далаға алып кеткен. Сол жерде ол шетелдік қонақты өз еркінен тыс жыныстық қатынасқа мәжбүрледі деп мәлімделген.
Қазіргі таңда Бәйдібек аудандық полиция басқармасы арызда көрсетілген осы жантүршігерлік мәліметтер бойынша тексеру жұмыстарын бастап кетті.
Айта кетерлік бір жайт, Шымкент қалалық сотының баспасөз қызметі осыған дейін мәлімдегендей, Ерғали Аманбаев 2025 жылдың 22 тамызындағы сот шешімімен бір жылға көлік жүргізу құқығынан айырылған болатын. Дегенмен, жәбірленушінің айтуынша, оқиға кезінде ол жол ережесін бұзған баяғы Lexus көлігін өзі басқарып жүрген. Бұл жағдай депутаттың сот шешімін де елемегенін аңғартады.
