«Сатқын?»: Тасмағамбетов мәлімдеме жасап, өзін қаралағандарға жауап берді (видео)

Соңғы уақытта қоғамда қызу талқыға түскен Иманғали Тасмағамбетовке қатысты әлеуметтік желілерде тарап кеткен әртүрлі пікірлер мен айыптаулар қоғам назарын аударғаны белгілі. Ел арасында түрлі алыпқашпа әңгімелер өріп, кейбір қолданушылар оның отансүйгіштігіне күмән келтіріп, тіпті «сатқын» деп айыптаған жандар да табылды. Бұл туралы Todayinfo ақпарат агенттігі хабарлайды. Алайда, мемлекет және қоғам қайраткері Иманғали Тасмағамбетов бұл жағдайға қатысты алғаш рет ашық мәлімдеме жасап, өз ұстанымын және өмірлік ұстанған қағидаларын қоғамға ашық жеткізді. Ол өзінің жауапты сөзінде халқына, еліне адал қызмет ету – өмірінің басты мақсаты болғанын баса айтты. «Ақиқат – Алланың алдында анық» Тасмағамбетов мәлімдемесінде: «Сотқа жүгініп, біреумен дауласып жүрген адам емеспін. Себебі ақтың отын ақымақ өшіре алмайды», – деп, ел арасындағы әділдіктің тек көзге көрінбейтін, бірақ жүрекпен сезілетін құндылық екенін меңзеді. Қоғам қайраткері әлеуметтік желіде айтылған жалған ақпараттар мен орынсыз кінәлаулардың адам абыройына тигізер әсерін жоққа шығармайды. Бірақ соларға бой алдырмай, сабыр мен парасат биігінен қарайтынын білдірді. Ол «әлеуметтік желінің жылдам таралуы – ар алдындағы жауапкершілікті ұмыттырмауы тиіс» деген ойын нақты айтты. «Мен – туған елдің перзентімін» Иманғали Нұрғалиұлы өз өмір жолы мен түп-тамырына тоқталып, Атырау өңірінде дүниеге келгенін, қазақы тәлім мен тәрбиені бойына сіңіргенін ерекше атап өтті. Ата-ана аманатын, туған топырақтың қасиетін бойтұмардай қадірлейтінін, елдің мүддесі жолындағы күресте ар-намысты биік қоятынын жеткізді. Ол халықаралық әскери ұйымдағы қызметі арқылы еліміздің қауіпсіздігін қорғауға өз үлесін қосқанын айтып, «ел мүддесі үшін отқа да, суға да түсу – мен үшін мәртебе» деді. Бұл тұрғыда ол өзі қызмет еткен кез келген лауазымда ұлттың абыройы мен мемлекеттің тәуелсіздігін қорғауды басты міндет санағанын айтты. «Жалған сөз – жара, ар – шындықтың қалқаны» Әлеуметтік желіде таралған ақпаратқа сын көзбен қарауға шақырған Тасмағамбетов: «Арлы адам – ең күшті адам», – деген Әбіш Кекілбаевтың сөзін мысалға келтіріп, адалдық пен ұстанымның тұрақтылығын биікке қойды. Оның айтуынша, қазіргі заманғы ақпарат тасқынында әрбір азамат шындық пен өтірікті айыра білуі тиіс. «Өз ұлтына қарсы тұру – қаныпезерлік, ал біреудің сойылын соғу – соқырлық» деген пікірі арқылы ол қазіргі геосаяси жағдайда ұлт бірлігі мен сана тәуелсіздігінің маңызын алға тартады. Елден жырақ жүрсе де – елмен бірге Иманғали Тасмағамбетов қазіргі таңда Қазақстан аумағынан тыс жерде қызмет етсе де, өзінің ойы, жүрегі, үміті әрдайым туған елімен бірге екенін жеткізді. Елге деген сағынышы мен мақтаныш сезімін жасыра алмай, Қазақстанның әрбір жетістігін – өзінің жеңісі деп санайтынын айтты. Сонымен қатар ол халқымыздың рухани қолдауын әрдайым сезініп, ел алдындағы жауапкершілікті ұмытпағанын атап өтті. Қызмет барысында ешқашан ұялатындай іс-әрекетке бармағанын айтып, ар алдында да, халық алдында да жүзі жарық екенін сеніммен жеткізді. Сабыр мен парасат – берекенің бастауы Қоғамда орын алып жатқан кейбір әділетсіз пікірлерге сабырмен жауап қайтарған Иманғали Тасмағамбетов өзінің әрбір сөзімен елді ауызбіршілікке, парасатқа, ойлы көзқарасқа шақырды. Ол ар мен намысты бәрінен жоғары қойып, елдің тұтастығы үшін күрескен азамат екенін тағы бір мәрте дәлелдеді. Ораза айт құтты болсын! деп аяқтаған мәлімдемесінде ол барша халыққа ізгі тілегін білдіріп, бірлік пен амандық тіледі. Иманғали Тасмағамбетовтің бұл мәлімдемесі – көпшілікке ой салар, елдік мүдде тұрғысынан маңызды үндеу болды.