Сәтбаев қаласының тұрғыны Карина Оспанова әкімдік ғимаратында өзіне күш қолданылып, телефоны тартып алынғанын мәлімдеді. Ол Қазақстан Республикасының Вице-президенті Ерлан Қаринге үндеу жасап, аталған оқиғаға байланысты қозғалған қылмыстық істердің объективті тергелуін бақылауға алуды сұрады, деп хабарлайды Ozgeris.info.
Карина Оспанованың айтуынша, оқиға 2026 жылғы 29 шілдеде Сәтбаев қаласының әкімдігінде болған. Ол сол күні Өнеркәсіп министрлігінің өкілдерімен кездесуге шақырылғанын айтады.
«Менің аты-жөнім – Оспанова Карина Серіканқызы. Қазақстан Республикасының Вице-президенті Ерлан Тынымбайұлы Қаринге үндеу жолдаймын. 2026 жылғы 29 шілдеде мені Өнеркәсіп министрлігінің өкілдерімен кездесуге Сәтбаев қаласының әкімдігіне шақырды. Алайда әкімдік ғимаратының ішінде маған шабуыл жасалды. Маған ішкі саясат бөлімінің басшысы Құрақпай Амангелді Қайратұлы тап беріп, қолымдағы телефонымды жұлып алды. Телефонымды қайтаруды талап еткенімде, ол қолымды қайырып, қысып, маған күш қолдана бастады. Сол кезде құжаттарым салынған планшетім де бүлінді. Менімен бірге Сәтбаев қаласының тағы екі тұрғыны болған. Олардың біріне әкімдікке кіреберістегі фойеде шабуыл жасалды. Оның телефонын Сәтбаев қаласы әкімінің орынбасары Ахмед Сыздыманов тартып алмақшы болды», – деді ол.
Оспанованың сөзінше, аталған екі жағдай бойынша қылмыстық іс қозғалған. Алайда екі жарым айға жуық уақыт өтсе де, ол тергеудің барысы туралы толық ақпарат ала алмаған.
«Осы деректер бойынша екі қылмыстық іс қозғалды. Бірақ екі жарым айға жуық уақыт өтсе де, әлі күнге дейін ештеңе белгісіз. Мені қылмыстық істің материалдарымен таныстырған жоқ. Іс бойынша не болып жатқанын білмеймін. Белгілі бір тергеу әрекеттері жүргізілгенімен, осы уақытқа дейін екі істің ешқайсысы бойынша беттестіру болған жоқ. Ең бастысы, тергеу істі Қылмыстық кодекстің 109-бабы – “Ұрып-соғу” бойынша саралап отыр. Бұл көшеде болған қарапайым төбелес секілді қарастырылуда. Ал лауазымдық өкілеттіктерді асыра пайдалану мәселесі ешкімді қызықтырмайтын сияқты. Оқиға мемлекеттік мекемеде, қызметтік міндетін атқарып жүрген мемлекеттік қызметшілердің қатысуымен болып отыр», – деді Карина Оспанова.
Ол Құрақпай Амангелді Қайратұлына қатысты планшетті қасақана бүлдіру дерегі бойынша әкімшілік сот өткенін де айтты. Сот шешімі Оспанованың пайдасына шығарылмаған. Дегенмен ол істің мән-жайы толық зерттелмеді деп есептейді. Қала тұрғынының сөзінше, оқиғаны басынан аяғына дейін көрген әкімдік хатшысы бар.
Бұған қоса, оқиғадан кейін хатшымен болған әңгіменің аудиожазбасы сақталған. Жазбаға басылған диалог төмендегідей:
– Менің телефонымды тартып алған адамның аты-жөні кім?
– Амангелді Қайратұлы, ішкі саясат бөлімінің басшысы.
Оспанова бұл аудиожазба хатшының оқиғадан кейін телефонды кім алғанын нақты айтқанын дәлелдейді деп отыр. Алайда оның мәлімдеуінше, сотта хатшы бұрынғы сөзін түсіндіре алмайтынын айтып, қойылған сұрақты дұрыс түсінбегенін жеткізген.
«Мен сотты және оның шешімін құрметтеймін. Бірақ оқиғаның мән-жайы қаншалықты толық зерттелді деген күрделі сұрақтарым қалды. Сот отырысында оқиғаны тікелей көрмеген адамдардан жауап алынып, шешім сол көрсетулердің негізінде қабылданды. Ал қақтығыс кезінде сол жерде болып, бәрін басынан аяғына дейін көрген адам – хатшы. Оқиғадан кейін онымен болған әңгіменің аудиожазбасы да бар. Ол жазбада менің телефонымды алған адамның есімін атайды. Бірақ сотта аудиожазба мен оның бұрынғы сөзі туралы мәселе көтерілгенде, ол мені дұрыс түсінбегенін, сұрақтың мәнін ұқпағанын және бұрын айтқан сөзін түсіндіре алмайтынын мәлімдеді. Оқиғадан кейін бірден бір нәрсе айтып, кейін сотта өз сөзінің мағынасын түсіндіруден неге бас тартқаны маған түсініксіз. Сот осы қайшылыққа принципті баға береді деп күттім», – деді ол.
Үндеу авторы 2026 жылғы 17 қыркүйекте Сәтбаев қаласының әкімі Мұрат Бөрібаевтың Жезқазған қаласының әкімі болып тағайындалғанына да назар аударды. Ол бұрынғы әкімді оқиғаға тікелей кінәлап отырмағанын, алайда жағдай оның басшылығы тұсында болғанын атап өтті.
«Мен бұл оқиғаға Мұрат Бөрібаевтың өзі кінәлі деп отырған жоқпын. Бірақ жағдай дәл оның басшылығы кезінде болды. Соған қарамастан, ол қызметтік жоғарылау алды. Мұны қалай бағалау керектігін білмеймін. Қорытындыны өздеріңіз жасаңыздар. Мен тек әділдік сұраймын. Ерлан Тынымбайұлы, осы оқиғаны бақылауыңызға алып, құзырлы мемлекеттік органдарға қылмыстық істердің толық әрі объективті тергелуін қамтамасыз етуді тапсыруыңызды сұраймын. Сотқа дейінгі тергеп-тексерудің неліктен созылып жатқанын тексеріп, маған жәбірленуші тарап ретінде қандай процестік әрекеттер жүргізілгені туралы ақпарат берілуін өтінемін», – деді Оспанова.
Үндеу 12 қазанға белгіленген әкімшілік іс бойынша апелляциялық отырыстың қарсаңында жазылған.
«Мен өз құқығымды қорғаймын. Бірақ, Вице-президент мырза, бұл оқиғаның ведомстволар мен кабинеттер арасында жоғалып кетуіне жол бермеуіңізді сұраймын. Маған сіздің қорғауыңыз қажет. Маған әділдік керек. Сізден осыны сұраймын», – деп түйіндеді ол.
Ескерту! Материалда айтылған жайттар – Карина Оспанованың мәлімдемесі. Тергеу аяқталып, соттың заңды күшіне енген шешімі шыққанға дейін аталған тұлғалар кінәсіз деп есептеледі. Редакция материалда аты аталған азаматтар мен мемлекеттік органдардың ұстанымын жариялауға дайын.
