Ринат Зайытов: Кәрім Мәсімов түрмеден босап шықса таңғалмаймын

БАҚ өкілдері Мәжіліс депутаты Ринат Зайытовқа Ұлттық қауіпсіздік комитетінің бұрынғы төрағасы, бүгінде абақтыда отырған «Кәрім Мәсімовтің бостандыққа шығуы мүмкін бе?» деген сұрақ қойды. Депутаттың айтуынша, ол Мәсімов түрмеден босап шықса да таңғалмайды.

«Таңғалмаушы едім. Бізде бәрі мүмкін. Жақында ғана бір кісі (Қайрат Боранбаев – р.) түрмеден шыға сала Паралимпиада комитетінің төрағасы болып сайланды емес пе?! Сондықтан ештеңеге таңғалмаймын. Біздің сот жүйесі қалай жұмыс істейтінін әлі күнге дейін түсіне алмаймын», – деді Зайытов.

Айта кетейік, мемлекетке опасыздық жасағаны және билікті басып алуға тырысқаны үшін сотталған ҰҚК-нің бұрынғы басшысы Кәрім Мәсімов кешірім жасау туралы өтініш білдіргені хабарланған еді.