Ulysmedia.kz мәліметінше, Солтүстік Қазақстан облысындағы Қызылжар аудандық соты Украинаға қарсы соғысқа қатысқаны үшін қазақстандық азаматқа үкім шығарды.
Іс материалдарына сәйкес, 2000 жылы туған азамат 2025 жылдың ақпан айында Ресейге жұмыс іздеп барған. Сол жерде волонтерлердің ұсынысымен Ресей Қарулы Күштері қатарына ерікті түрде қосылып, бір жылдық келісімшарт жасаған. Дайындықтан өткен соң ол ұрыс аймағына жіберілген. 30 сәуірде жарақат алып, шілде айының басында бөлімшені өз бетінше тастап, Қазақстанға оралған.
Сот оны ҚР Қылмыстық кодексінің 172-бабы («Шетелдік қарулы қақтығыстарға қатысу») бойынша кінәлі деп танып, орташа қауіпсіздік деңгейіндегі қылмыстық-атқару мекемесінде өтеумен 6 жылға бас бостандығынан айырды.
Еске салайық, Қазақстан заңнамасына сәйкес, жалдамалылық үшін қылмыстық жауапкершілік қарастырылған. Ал басқа мемлекеттің аумағындағы әскери қимылдарға жалдамалылық белгілерінсіз қатысқандар 5 жылдан 9 жылға дейін бас бостандығынан айырылуы мүмкін. Ал жалдамалылық үшін 7 жылдан бастап өмір бойына дейінгі жаза, азаматтықтан айыру және мүлікті тәркілеу көзделген.
Контекст ретінде айта кетсек, Қазақстан бұған дейін 30 жастағы Нұрсұлтан Исаковты іздеуге жариялаған. Ол туралы қаңтар айында Хочу жить украин мемлекеттік жобасы хабарлаған, кейін оның украин тұтқынында болғаны белгілі болды.
