Орталық сайлау комиссиясы сағат 12 жағдай бойынша жаңа Конституция жобасына қатысты референдумда төрт миллионнан астам қазақстандық дауыс бергенін мәлімдеді, деп хабарлайды Ozgeris.info сайты.
15 наурызда басталған конституциялық реформа бойынша жалпыұлттық дауыс беру науқаны жалғасып жатыр. Орталық сайлау комиссиясының мүшесі Әсел Жанабилова түскі уақытқа дейін сайлаушылардың жалпы келу көрсеткіші 37,5 пайызды құрағанын және қазіргі сәтке дейін 4 миллионнан аса азамат өз таңдауын жасағанын жеткізді.
Аумақтық комиссиялардың мәліметіне сәйкес өңірлер арасында Ақтөбе облысы 45,73 пайызбен көш бастап тұр. Одан кейін Ақмола облысында 44,66 пайыз, Түркістан облысында 44,13 пайыз, Жетісуда 43,32 пайыз және Қызылорда облысында 43,18 пайыз халық дауыс берді. Сондай-ақ Қарағанды өңірінде 42,95 пайыз, Шығыс Қазақстанда 42,88 пайыз, Шымкент қаласында 42,59 пайыз, Атырау облысында 42,29 пайыз, Абай облысында 41,93 пайыз және Солтүстік Қазақстан облысында 41,64 пайыз сайлаушы учаскелерге барған.
Алматы облысында тұрғындардың 40,41 пайызы дауыс берсе, Қостанайда бұл көрсеткіш 37,10 пайызды құрады. Батыс Қазақстан және Ұлытау облыстарында сайлаушылардың келуі бірдей 36,59 пайыз болса, Павлодарда 36,57 пайызды көрсетіп тұр. Жамбыл облысында 35,86 пайыз, Маңғыстауда 34,57 пайыз және Астана қаласында 31,23 пайыз азамат өз борышын өтеген. Ең төменгі белсенділік Алматы қаласында тіркеліп, онда әзірге тұрғындардың тек 14,85 пайызы ғана таңдауын жасаған.
