Криштиану Роналду үшін биылғы әлем чемпионаты соңғысы болды. Аты аңызға айналған спортшы жасыл алаңнан көзіне жас алып шықты. Баспасөз мәслихаты өтетін залда ол өзінің ұлттық құрамадағы мансабын аяқтағанын растады. Футболшы ішіне мұң ұялағанын жасырмады. Бірақ бар күш-жігерін сарқа жұмсағандықтан ары таза екенін кесіп айтты, деп хабарлайды ozgeris.info сайты.
Осы ауыр жеңілістен кейін Португалия құрамасының бас бапкері де қызметінен кететінін жариялады. Роберто Мартинестің келісімшарты бүгін ресми түрде өз мәресіне жетті. Ендігі нақты шешімді Португалия футбол федерациясының президенттері мен директорлар кеңесі қабылдайды.
Бапкер журналистермен кездесуде Испанияға қарсы ойынның жай-жапсарын түсіндірді. Екі құраманың күші тең түскен. Алайда жеңіс тағдырын кішігірім бөлшектер шешіп кетті. Мартинес жігіттердің намысты қолдан бермей жан-тәнімен ойнағанын мақтан тұтады. Ол бұл кездесуді биылғы біріншіліктегі ең үздік матч деп бағалады. Маманның осы додаға келгендегі басты мақсаты кубокты жеңіп алу еді. Арманы орындалмағандықтан ол енді бапкерлік қызметте қалудың ешқандай мәні жоқ екенін ашық жеткізді.
