Трансгендер блогер Niko Nett (Ника Турганова) SHYNDYK подкастында Астанадағы ықпалды саясаткермен болған сәтсіз қарым-қатынасы туралы айтып берді. Оның сөзінше, бұл таныстық кейін сот процесімен аяқталған, деп хабарлайды ozgeris.info.
Ника Турганованың айтуынша, ол ер адаммен жұмыс барысында, менеджері мен оның көмекшісі арқылы танысқан. Алайда іскерлік әріптестік сәтсіз аяқталғанымен, саясаткер блогерге жеке қызығушылық танытып, белсенді түрде көңіл бөле бастаған.
Блогер ер адамның нақты қай салада қызмет атқаратынын білмегенін, алайда оның ерекше жомарттығын атап өтті. Айтуынша, саясаткер оған қаржылай қолдау көрсетіп, қымбат сыйлықтар тарту еткен. Олардың қатарында Hyundai Palisade автокөлігі мен Dolce & Gabbana брендіне тиесілі аяқ киімдер болған. Ника бұл адамның өзін әрі әйел ретінде, әрі тұлға ретінде ұнатқанын жеткізді.
Алайда жағдай блогер саясаткердің көңілін кері қайтарған сәттен кейін күрт өзгерген. Ер адам одан кек алу мақсатында сотқа жүгініп, Никаға берген барлық ақша мен сыйлықтарды қайтаруды талап еткен.
Ника Турганова бұл кезеңді «нағыз қорқынышты түс» деп сипаттады. Оның айтуынша, сот барысында ол барлық сыйлықтардың өз еркімен, ешқандай міндеттемесіз берілгенін ашық айтқан. Нәтижесінде сот блогердің уәжін қолдап, саясаткердің талап-арызын қанағаттандырудан бас тартқан.
Бұл оқиға әлеуметтік желі қолданушылары арасында қызу талқыланып, жеке қарым-қатынастардағы жауапкершілік пен сыйлықтардың құқықтық мәртебесі туралы сұрақтарды қайта күн тәртібіне шығарды.
