Қытайдың Харбин қаласында 5–10 желтоқсан аралығында Шанхай ынтымақтастық ұйымына мүше және бақылаушы мемлекеттердің 2007–2008 жылы туған жас боксшылары арасында халықаралық турнир өтті. Байрақты бәсекеге Қытайдың әр провинциясынан жасақталған құрамалар, сондай-ақ Ресей, Қазақстан, Өзбекстан, Қырғызстан, Беларусь, Тәжікстан және Моңғолия спортшылары қатысты деп хабарлайды Оzgeris.info.
Қазақстан құрамасы атынан сынға түскен МОО «Дала Қырандары» қозғалысының мүшесі, қостанайлық жас боксшы Айдос Үсенов 54 келі салмақ дәрежесінде үш жекпе-жекте жеңіске жетіп, финалға сенімді түрде өтті.
Алайда шешуші кездесуде белорусиялық қарсыласына төрешілердің даулы 3:2 есебі бойынша жол беріп, күміс медаль иеленді.
Айдостың турнирдегі ерекше табандылығы мен жігері бағаланып, ол «Жеңіске деген жігері үшін» арнайы марапатпен де атап өтілді.
