Еңбек және халықты әлеуметтік қорғау министрлігі 2025 жылдың қаңтарындағы демалыс күнін ауыстыру туралы бұйрық дайындады. Бұйрыққа сәйкес, 2025 жылғы 1-4 қаңтар демалыс күндері болып белгіленді, деп хабарлайды ведомствоға сілтеме жасаған ozgeris.info.
Ведомство мәліметінше, еңбек және халықты әлеуметтік қорғау министрінің "2025 жылы демалыс күнін ауыстыру туралы" бұйрығына сәйкес, 2025 жылғы 5 қаңтардағы жексенбі, яғни демалыс күні 2025 жылғы 3 қаңтарға, жұмаға ауыстырылады. Осылайша, аптасына бес күн жұмыс жасайтын қазақстандықтар 1-4 қаңтар, ал аптасына алты күн жұмыс істейтін азаматтар 1-3 қаңтар күндері демалады.
"Демалыс күнін ауыстыру жұмыс уақытын оңтайлы бөлуге және азаматтардың демалысы үшін қолайлы жағдай жасауға мүмкіндік береді", - делінген хабарламада.
Айта кетейік, Тәуелсіздік күніне орай желтоқсанда аптасына бес күндік жұмыс істейтіндер 14, 15, 16 желтоқсанда, яғни сенбі, жексенбі және дүйсенбі күндері демалады. Сонымен қатар 2024 жылғы 30-31 желтоқсан жұмыс күндері.
