Қытайда өткен 17-ші "Жазғы Давос" дүниежүзілік экономикалық форумы еліміз үшін үлкен инвестициялық жобаларға жол ашты. Үкімет басшысы Олжас Бектенов технология, өнеркәсіп және автокөлік жасау саласындағы қытайлық алып компаниялардың басшыларымен кездесті. Басты мақсат Президент Қасым-Жомарт Тоқаевтың тапсырмасына сай елімізге жаңа технологиялар әкеліп, шетелдік өндіріс ошақтарын өз жерімізде ашу, деп хабарлайды ozgeris.info сайты.
Келіссөздердің ең қызықты бөлігі технология мен автокөлік саласына арналды. Fortune Global 500 рейтингіне кіретін танымал Guangzhou Automobile Group корпорациясы енді көліктерін Қазақстанға жай ғана сатып қоймайды. Директорлар кеңесінің төрағасы Фэн Синья бұл көліктерді біздің елде құрастыруға дайын екенін жеткізді. Алдағы 2026-2028 жылдары аралығында іштен жану қозғалтқышы бар және гибридті 17 мың автокөлік конвейерден шықпақ.
Көлік өндірісімен қатар аккумулятор жасау ісі де жанданады. Әлемдегі тартқыш батареялар нарығының 40 пайызға жуығын бақылап отырған CATL компаниясының негізін қалаушы Цэн Юйцюн үлкен жоспарларымен бөлісті. Бұл кәсіпорын елімізде шикізатты өңдеп, дайын аккумуляторлар мен энергия сақтау жүйелерін шығаруды көздеп отыр. Болашақта ескі батареяларды қайта өңдеу ісі де қолға алынбақ.
Еліміз үшін тағы бір стратегиялық бағыт цифрландыру саласы саналады. Мемлекет басшысы 2026 жылды Цифрландыру және жасанды интеллект жылы деп жариялап, арнайы ұлттық стратегия бекіткен болатын. Осы бағытта SuperX AI Technology Limited компаниясының басшысы Хуан Чэньхун елімізде қуаты 1 гигаватқа жететін алып AI Data Center кластерін салуды ұсынды. Жоба 2029 жылға дейін кезең-кезеңімен іске қосылады. Мұнда жасанды интеллект кампусын тұрғызып, заманауи серверлік жабдықтар орнату жоспарланған. Үкімет бұл ұсынысты жан-жақты зерттеу үшін арнайы жұмыс тобын құрды.
Ауыр өнеркәсіп пен логистика саласында да ауқымды жаңалықтар бар. Jinyi Holding Group басшысы Цзинь Пэн Ақтөбе облысында ірі индустриялық-логистикалық парк құру бастамасын көтерді. Бұл алаңда барлық инфрақұрылым дайын тұрады, яғни шетелдік зауыттар келіп бірден жұмысын бастай алады. Қазірдің өзінде бұл холдинг Ақтөбеде "жасыл" мыс зауытын және Батыс Қазақстан облысында үлкен хаб салып жатыр.
Пайдалы қазбаларды терең өңдеу ісіне Xiamen Wanli Stone компаниясы қызығушылық танытты. Төраға Ху Цзиньпэй көмірден сутегі мен жоғары сапалы мұнай өнімдерін алудың біріктірілген тізбегін таныстырды. Бұған қоса кәсіпорын молибден, германий және рений сияқты өте бағалы сирек металдарды өңдеуге ниетті. Ал металлургиялық инжиниринг бойынша әлемдік көшбасшы саналатын CISDI Engineering вице-президенти Юн Лю отандық зауыттарды жаңғырту жолдарын ұсынды. Олар шойынды артық күкірттен тазартып, жаңа құю кешенін салуға инжинирингтік көмек көрсетпек.
Ауыл шаруашылығын дамыту мәселесі де назардан тыс қалмады. Yulin Irrigation компаниясының бас директоры Ци Юбо Қызылорда облысында суару жабдықтарын құрастыратын зауыт ашуды жоспарлап отыр. Бұл заманауи технологиялар суды үнемдеп, диқандардың өнімін арттыруға тікелей әсер етеді.
Келіссөздерді қорытындылаған Олжас Бектенов Қазақстанның есігі нағыз инвесторлар үшін әрқашан ашық екенін қадап айтты. Үкімет технология әкеліп, жергілікті өндірісті дамытатын кәсіпкерлерге барынша қолайлы жағдай жасайды. Осы жиыннан кейін барлық жауапты министрліктер мен Kazakh Invest ұлттық компаниясына аталған жобаларды тез арада іске асыру міндеттелді.
