Мемлекет басшысы Қасым-Жомарт Тоқаевтың Америка Құрама Штаттарына жасаған сапары барысында бірқатар ірі инвестициялық жобалар бойынша уағдаластықтарға қол жеткізілді, деп хабарлайды ozgeris.info сайты.
The Times of Central Asia мәліметінше, Президент Вашингтонда халықаралық қаржы ұйымдарының өкілдерімен кездесіп, ұзақ мерзімді капитал тарту және Қазақстанның жаһандық құн тізбегіндегі рөлін күшейту мәселелерін талқылады.
Сапардың маңызды нәтижелерінің бірі – Ауыл шаруашылығы министрлігі мен Mars компаниясы арасындағы 180 млн долларлық келісім. Жоба аясында Алатауда ауыл шаруашылығы өнімдерін терең өңдеп, үй жануарларына арналған азық өндіретін өндіріс орны салынбақ. Компания басшысы Поул Вейраух бұл бастама Орталық Азия нарығындағы позицияны нығайтатынын айтты.
Денсаулық сақтау саласында Ashmore Group-пен халықаралық деңгейдегі клиника ашу мүмкіндігі қарастырылды. Жобаны Ashmore Healthcare International және «Самұрық-Қазына Инвест» бірлесіп жүзеге асыруы ықтимал. Медициналық нысанның операторы ретінде Mount Sinai Health System тартылмақ.
Boeing басшылығымен өткен кездесуде Air Astana, SCAT және VietJet Qazaqstan әуе компаниялары ынтымақтастықты кеңейтуге мүдделі екені айтылды. 2026 жылдың екінші жартысында Air Astana Boeing 787 Dreamliner ұшақтарын алып, Қазақстан мен АҚШ арасында тікелей әуе қатынасын ашуды жоспарлайды. SCAT қосымша әуе кемелерін сатып алып, Шымкент әуежайында техникалық қызмет көрсету орталығын құруды көздеп отыр.
Сапар қорытындысында АҚШ Халықаралық дамуды қаржыландыру корпорациясының басшысы Бен Блэк Қазақстанды Еуразия кеңістігіндегі маңызды серіктес ретінде бағалады. Келіссөздерде тау-кен өнеркәсібі мен көлік-транзит инфрақұрылымын дамыту бағыттары талқыланды. БҰҰ есебіне сәйкес, Қазақстан Орталық Азияда тікелей шетелдік инвестиция көлемі бойынша алдыңғы орында.
Сонымен қатар Президент Вашингтонда өткен Бейбітшілік кеңесінің алғашқы отырысына қатысып, Газа секторын қалпына келтіру және бейбіт бастамаларды қолдауға дайын екенін мәлімдеді.
