Қазақстандық балмұздақ сыртқы нарықта сұранысқа ие бола бастады. Биылғы жылдың алғашқы төрт айында еліміз 4,3 мың тонна балмұздақ экспорттап, өткен жылмен салыстырғанда бұл көрсеткішті 41,6%-ға арттырды. Ұлттық статистика бюросының дерегінше, отандық өнімнің негізгі сатып алушылары – Қытай мен ТМД елдері, деп жазады Ozgeris.info.
Балмұздақтың сыртқы нарықтағы үлесі артып келе жатқанымен, ішкі нарық та назардан тыс емес. 2025 жылғы қаңтар-мамыр аралығында елімізде жалпы көлемі 23,8 мың тонна балмұздақ пен тағамдық мұз өндірілген. Бұл көрсеткіш 2024 жылдың сәйкес кезеңімен салыстырғанда 17,1%-ға жоғары. Яғни, қазақстандық өндірушілер маусымдық сұранысты ғана емес, экспорттық әлеуетті де қамтуда.
Алайда, импорт та өз орнын сақтап отыр. Аталған кезеңде елге 3 мың тонна балмұздақ әкелінген. Импорттық өнім жалпы нарықтың 15,4%-ын құрайды. Яғни, нарықтың едәуір бөлігін отандық өнім иеленіп отыр.
Қазақстанға балмұздақ негізінен үш елден жеткізіледі:
- Ресей – 1,5 мың тонна
- Қырғызстан – 1 мың тонна
- Түркия – 300 тонна
Бұдан бөлек, балмұздақ Өзбекстан, Швейцария, Беларусь пен Италиядан да импортталған. Бұл Қазақстан нарығында шетелдік брендтердің де өз орны бар екенін көрсетеді.