Жақында тұрмысқа шығатынын мәлімдеген тележүргізуші әрі журналист Диана Скатова қазақ қоғамындағы той дәстүрлеріне қатысты пікір білдірді, деп хабарлайды ozgeris.info сайты.
Ол әлеуметтік желідегі парақшасында қазіргі құдалық пен тойға байланысты кейбір жөн-жоралғыларды заман талабына сай жаңарту қажет екенін айтты.
«Қазақ қоғамы тойдың ырымдарын, құдалықтың жөн-жоралғысын қайта қарастыру керек сияқты. Керек емес тірлік көп. Меніңше тозды. Заманға сай жаңартып, ешкімге ауырлық салмайтын деңгейге келу керек», – деп жазды Диана Скатова.
Журналистің бұл пікірі желі қолданушылары арасында қызу талқыланып жатыр. Бірі оның ойын қолдап, қазіргі таңда той жасау мен құдалық өткізу барысында артық шығын мен қажетсіз салттардың көбейіп кеткенін айтса, енді бірі ұлттық дәстүрді сақтаудың маңызын алға тартқан.
Айта кетейік, бұған дейін Диана Скатова тұрмыс құруға дайындалып жатқанын хабарлап, оқырмандарынан ақ тілегін қабыл алған болатын. Енді ол алдағы қуанышты сәт қарсаңында қазақы салт-дәстүрді заманға бейімдеу мәселесін көтеріп отыр.
