Солтүстік Қазақстан облысындағы "Қызылжар Жем" жауапкершілігі шектеулі серіктестігінің қожалығына Үкімет басшысы арнайы барды. Премьер-министр өңірдегі егін егу науқанының қорытынды нәтижелерімен егжей-тегжейлі танысып, аса ерте пісетін дәнді дақылдар егілген алқапты көріп шықты. Аталған кәсіпорын аралас ауыл шаруашылығы бағытын дамытуға маманданған, деп хабарлайды ozgeris.info сайты.
Шаруашылық жетекшісі Данияр Анафин тәжірибелік алаңда атқарылатын тың жоспарлармен бөлісті. Мұнда "Secobra Recherches S.A." компаниясының француздық сұрыптау технологиясынан шыққан "Calixo" атты жұмсақ жаздық бидай түрін себу көзделіп отыр. Бұл дақылдың басты ерекшелігі өте ерте пісетіндігінде жатыр. Оның толық өсіп-жетілу кезеңі небәрі 85 күнді қамтиды және өнімділігі жоғары болып келеді. Осыған дейін бұл сұрып топырағы мен климаты Теріскей аймағына өте ұқсас келетін Батыс Сібір өңірлерінде өзінің жоғары тиімділігін толық дәлелдеген. Қолайлы ауа райы орнаған жылдары бұл бидайдың әр гектарынан 60 центнерге дойын өнім алынған. Экономикалық пайдасы жағынан бұл өнім табысы жоғары бірқатар дақылдармен еркін бәсекелесе алады. Осы қасиеті оны Солтүстік Қазақстан облысының аграрлық секторына кеңінен енгізу үшін келешегі зор етеді. Жаңа бидайды өсіру үдерісін "Солтүстік Қазақстан ауыл шаруашылығы тәжірибе стансасы" мамандары тікелей сүйемелдеп отыр.
Ауыл шаруашылығымен қатар аймақта заманауи технологияларды енгізу ісі де қарқын алды. Солтүстік Қазақстан облысы әкімі аппаратының басшысы Руслан Әлішев өңірді өркендетуге бағытталған цифрлық шешімдер мен "Digital Aimaq" жобасының атқарылу барысын мәлімдеді. Қазіргі таңда облыс көлемінде ауыл тұрғындарының жаңа технологиялармен жұмыс істеуіне жағдай жасайтын 10 аудандық және 3 ауылдық креативті IT-орталықтар нәтижелі қызмет көрсетуде. Жыл аяғына дейін шалғай елді мекендерде осындай тағы 11 орталықты пайдалануға беру жоспарланған.
Бүгінде "SKO Hub" Closure және "Qyzyljar Creative Center" алаңдарында 3 мыңнан астам азамат цифрлық дағдыларды меңгеріп шықты. Осы уақытқа дейін мұнда 400-ден астам ауқымды іс-шара ұйымдастырылып, 30 жаңа стартап жобасы өмірге келді. Қазіргі уақытта бұл бағытқа қосымша инвестициялар тартылып жатыр. Осы атқарылған жұмыстардың ауқымын Қытай мемлекетінің "Digital village" жобасының озық тәжірибесі аясында одан әрі кеңейту мәселесі жан-жақты пысықталуда.
Жуық арада аймақта "Digital Qyzyljar" IT-паркін құру көзделіп отыр. Бұл жоспар өңірдегі жергілікті IT-компаниялардың қанат жайып өсуіне қолайлы жағдай туғызады. Сонымен қатар "Digital Aimaq" өңірлік жобасын басқаратын бірыңғай үйлестіру орталығын қалыптастыруға мүмкіндік береді. Жаңа Парк облыс экономикасының негізгі салаларын цифрлық форматқа көшіру үдерісін барынша жеделдетпек.
