«GALANZ Bottlers» компаниясының Жаңа жылға арналған корпоративтік кешінде компания басшысы Тұрсынғали Алагөзов 2025 жылдың қорытындысын шығарып, ұжымға ерекше жаңалығын жариялады деп жазады Оzgeris.info. Ол компания қызметкерлерінің ата-аналарына ай сайынғы қаржылай қолдау көрсетілетінін мәлімдеді.
Корпоративтік кеш барысында зал толы әріптестердің ыстық ықыласына бөленген кәсіпкер 65 жастан асқан әрбір қызметкердің ата-анасына компания атынан ай сайын 50 мың теңге көлемінде «пенсия» төленетінін айтты. Бұл төлем ата-аналардың өмір бойғы еңбегі мен тәрбиесінің белгісі ретінде қарастырылмақ.
Тұрсынғали Алагөзов өз сөзінде ата-ананың қоғамдағы және жеке тұлға қалыптастырудағы рөлін ерекше атап өтті.
«Маған осындай адал, жауапкершілігі жоғары маман сыйлаған әрбір ата-ана құрметке лайық. Сондықтан жастары 65-тен асқан әрқайсыңның ата-анаңа өз атымнан ай сайын 50 мың теңге пенсия төлеймін», – деді ол.
