Алматыдағы "Small" супермаркетінде тілге бола туындаған жанжал қоғамда қызу талқыға түсті. Осы шулы оқиғадан кейін әлеуметтік желілерде орысша сөйлеуді талап ететіндерге қалай жауап беру керектігін көрсететін ескі бейнежазба кеңінен тарала бастады, деп хабарлайды ozgeris.info сайты.
Дүкендегі даудан соң желі қолданушысы он жыл бұрынғы архивтік видеоны қайта жүктеген. Онда белгілі мемлекет қайраткерінің ресми жиын барысында мемлекеттік тілдің мәртебесін қатаң қорғаған сәті бейнеленген. Желі қолданушысы бұл жазбасына "Мемлекетшіл адамның ұстанымы қандай болуы керек екенін сол кезде-ақ көрсеткен" деп баға беріпті.
Бейнежазбадан жиынға қатысушылардың бірі қазақша түсінбейтінін айтып, орыс тілінде сөйлеуді немесе аударып беруді сұрағанын байқауға болады. Бұған жауап ретінде төрағалық етуші шенеунік Қазақстандағы басты тіл қазақ тілі екенін шегелеп айтады. Орыс тілі тек ұлтаралық қатынас құралы екенін қатаң ескертеді. Ол қай елде өмір сүріп, еңбек етсең, міндетті түрде сол мемлекетті және оның заңдарын сыйлау қажет деген алтын қағиданы алға тартады.
Өз сөзін дәлелдеу үшін қайраткер Назарбаев зияткерлік мектебінде бес жыл жұмыс істеген АҚШ азаматын мысалға келтірген. Мұхиттың арғы жағынан келген шетелдік маман аз уақыт ішінде қазақ тілін мүлтіксіз меңгеріп, таза сөйлеп үйренген.
Бұл бейнежазбадағы ұстаным Алматыдағы соңғы оқиғамен тікелей үндесіп жатыр. Естеріңізге сала кетейік, касса алдында қызметкерден орысша жауап талап еткен әйелге сот шешімімен 20 айлық есептік көрсеткіш көлемінде айыппұл салынған болатын. Құқық қорғау органдары елдегі татулықтың басты шарты өзара сыйластық екенін ескертті. Ал қазақстандықтар бұл ескі бейнежазбаны ұлттық намысты қорғаудың таптырмас үлгісі деп жарыса бөлісіп жатыр.
